賴恩肯特、波比鄧肯分別轉投流浪、費倫天拿 | Liverpudlian Ty
利物浦翼鋒賴恩肯特（Ryan Kent）回歸蘇超球會格拉斯哥流浪，轉會費為 £6M。除咗賴恩肯特之外，上星期與球會鬧得不愉快嘅年青前鋒波比鄧肯（Bobby Duncan），亦勢將以 €2M 轉會費加盟意甲球會費倫天拿。
現年 22 歲嘅賴恩肯特，上季借往格拉斯哥流浪期間，表現不俗。格拉斯哥流浪擊敗布魯日，以 £6M 轉會費，喺轉會窗完結前簽下賴恩肯特。該蘇超球會已經作出合乎利物浦要求嘅報價，而賴恩肯特亦都渴望重返呢間由謝拉特執教嘅球會。
賴恩肯特上季外借往格拉斯哥流浪期間，上陣 43 次，表現唔錯，並且獲得蘇格蘭最佳年青球員獎項。
有唔少球會，包括格拉斯哥流浪，都對借用賴恩肯特感興趣，但係利物浦已經表明，將之前已經喺球員生涯上，被借用過 5 次嘅賴恩肯特再一次外借，其實並冇任何好處。
賴恩肯特有份參與利物浦嘅季前熱身賽，現時亦係利物浦 U23 展開球季。
英冠球會列斯聯曾有意羅致賴恩肯特，但係因為價格問題，最終並冇作出進一步嘅行動。
比甲球會布魯日喺最近呢幾個星期表示對賴恩肯特感興趣，佢哋亦都準備俾 £6M 轉會費作出羅致。
但係宜家格拉斯哥流浪作出嘅報價，令利物浦認為可以接受，預料賴恩肯特會前往格拉斯哥進行體測，同埋傾妥個人條件。利物浦亦都應該會喺呢項轉會加上 Sell-on clause。
波比鄧肯透過經理人 Saif Rubie 發表聲明，指控利物浦「精神上欺凌」同埋「摧毀緊佢嘅人生」。呢位現年 18 歲嘅前鋒，渴望離隊並尋求一隊嘅上陣機會。
本身係利物浦傳奇人物謝拉特表弟嘅波比鄧肯，將會與費倫天拿簽約 3 年，利物浦亦有 20% 嘅 sell-on clause。雖然同利物浦公開地鬧得不愉快，但係佢仍然會得到球會嘅祝福。
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
