路夫蘭投羅馬交易告吹｜Liverpudlian Ty
根據 Dominic King，利物浦終止與意甲球會羅馬就洛夫雲（Dejan Lovren，另譯路夫蘭）轉會嘅談判。由於羅馬表示會以 £15M 嘅轉會費羅致洛夫雲，但係都未有實質嘅行動同埋計劃，利物浦對此感到失望。利物浦一直都未接獲任何正式嘅報價，所以宜家呢個轉會告終。
Melissa Reddy表示，原來羅馬起初話買斷洛夫雲，後來想嘗試傾吓能否用一小筆借用費嚟借用佢，被利物浦拒絕。
來自《米蘭體育報》的消息指，洛夫雲轉投羅馬的交易告吹，是因為他提議羅馬可以減薪100萬歐元（年薪），卻要把把這筆錢變成獎金， 但羅馬方面拒絕其要求。
早前SKY Italia指，羅馬方面提出先借用洛夫雲一個球季，然後以2500萬歐元買斷，如果洛夫雲上陣達到特定場次，羅馬須強制買斷。
羅馬等意甲球會對洛夫雲有興趣，佢本身亦都想尋求上陣機會，準備結束喺利物浦 5 年嘅生涯。
根據Neil Jones的報道，羅馬曾經表示會準備以起碼 £15M 嘅轉會費簽下現年 30 歲嘅洛夫雲，利物浦亦都準備喺唔太願意嘅情況下俾佢離隊他投。
但係利物浦對於羅馬嘅轉會策略感到失望，該意甲球會予人嘅感覺係嘗試擾亂球員嘅軍心，然後想以平價將佢羅致。
雖然喺呢個星期進行咗談判，但係羅馬並冇作出實質嘅報價，反而想透過喺意大利嘅中介人士，嘗試去傾以平價借用，呢個借用要求已經隨即被利物浦拒絕。
談判終止之後，令羅馬領隊保羅方辛加感到失望。羅馬亦都只好向其他目標球員埋手，包括同樣係克羅地亞國腳嘅比錫達斯後衛杜馬哥維達，同埋曼聯後衛洛荷。
洛夫雲仍有可能喺今個月尾離隊，因為另一間意甲球會 AC 米蘭對佢有興趣，並且成為現時比較大機會得到呢位克羅地亞中堅嘅球會。但係 AC 米蘭會否出價達致利物浦嘅要求，就有待觀察。
利物浦喺上星期五對諾域治，同埋喺歐洲超級盃嘅賽事，洛夫雲都冇喺大軍之中，佢或有機會喺周末作客對前球會修咸頓。
另外，拿比基達因為喺星期二操練時臀部肌肉受傷，令佢無法上陣對修咸頓。利物浦領隊高普承認，佢現時未知呢位畿內亞國腳中場將要抖幾耐。
喺歐洲超級盃成為英雄嘅西班牙門將阿祖安，因為賽後慶祝時，被球場奔跑嘅球迷整傷咗，以致足踝腫脹，對修咸頓亦上陣成疑。
利物浦領隊高普喺對修咸頓嘅賽前記者招待會中表示：「我無法明白，點解喺一個社交媒體嘅世界，當我哋全部都喺埋一齊嘅時候，當時有一位球迷跳過一啲嘢，並且踢到阿祖安嘅足踝。阿祖安嘅足踝有腫脹嘅情況，我哋要作出觀察。除咗呢樣嘢，對佢嚟講，嗰晚係一個美好嘅晚上。」
利物浦有朗拿根準備喺對修咸頓嘅聯賽上陣。同時，年青門將基列夏嘅手腕傷患已經康復，或會喺大軍之中。
不過高普確認，阿祖安嘅傷勢比起初所擔心嘅狀況為佳，並且將會喺星期五晚上，球隊出發前往修咸頓之前，就其傷處作出評估。
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
