「ADRIAN!!!!!!」的燦爛之夜 | Liverpudlian Ty
呢個係一個令到利物浦領隊高普（Jurgen Klopp）話係「洛奇」嘅故事。
「ADRIAN!」，呢個係高普帶領利物浦，喺歐洲超級盃以互射十二碼擊敗車路士後，接受訪問時所高呼嘅名字。
喺賽事結束前嘅幾分鐘，只係加盟利物浦 10 日，現年 32 歲嘅阿祖安（Adrian），成功撲救到喺雙方互射十二碼嘅第 10 個十二碼，協助利物浦奪得喺 2019 年嘅第二項錦標。
連洛奇自己都應該會為呢個咁大嘅轉變而感到自豪。
喺兩個星期前，阿祖安係自由身，未有班落。佢喺上季尾離開韋斯咸之後，呢個夏天就喺自己嘅家鄉，西班牙嘅西維爾單獨操練。
曾經有幾個選擇令佢可以加盟一間新嘅球會，但係都未能成事。直到英格蘭社區盾嘅嗰個禮拜，接獲來自歐聯冠軍利物浦嘅來電。
阿祖安承認，及後所發生嘅事，就好似係一場夢咁。
阿祖安喺賽後慶祝嘅時候，接受利物浦官方媒體訪問時表示：「一個月前，我喺西班牙，喺我嘅門將教練及朋友嘅協助下，令我可以同自己操練。」
「喺兩個星期前，我真係唔知自己將會去邊間球會，會喺西班牙，定係其他聯賽。但係利物浦嘅出現，佢哋同我傾談同埋垂詢，加盟利物浦係宜家我人生之中最好嘅決定。」
「我知道呢啲時刻將會出現，但明顯地冇諗過會嚟得咁快。我喺利物浦真係好開心，隊友一開始就已經幫助我，佢哋猶如張開雙臂地歡迎我，令我有成為咗好朋友嘅感覺。」
「呢個係一個美好嘅夜晚。」
利物浦喺加時一度憑著文尼（Sadio Mane）嘅梅開二度，以 2-1 領先車路士，但係被過嚴地判決為喺禁區內侵犯車路士前鋒阿巴咸（Tammy Abraham），最終被球證判罰十二碼。
及後車路士由佐真奴射入十二碼，將比數追平至 2-2，令到今場已經係第 44 次舉行嘅歐洲超級盃，需要以互射十二碼分勝負，利物浦本身已經贏過 3 次歐洲超級盃。
雙方互射十二碼期間，前 9 輪嘅十二碼全部射入，直至車路士前鋒阿巴咸要面對阿祖安射十二碼 …… 最後阿祖安用腳封到阿巴咸所射嘅十二碼，令利物浦第 4 次奪得歐洲超級盃。
阿祖安話：「公平啲講，其實作為一個門將，撲救十二碼都要有一啲運氣，因為你需要去到啱嘅一邊，然後盡自己所能。」
「當時我去咗自己嘅左邊，但係我一直等到最後，最終我嘅右腳救到呢個十二碼，呢個撲救係難以置信嘅。所有嘅撲救都好，但係呢個係最後嘅一個撲救，都係好好。」
阿祖安成功撲救呢個十二碼之後，協助利物浦奪得歐洲超級盃。當時一眾利物浦嘅隊友圍住呢位西班牙門將，領隊高普更加係向佢飛奔，及後就係與球迷同樂嘅場面。
利物浦領隊高普賽後解釋點解咁真情流露，佢話：「喺賽前，我真係唔知道贏取呢項錦標嘅感覺會有幾好。但係真係非常好，呢個係重大嘅錦標。」
阿祖安強調，呢個係重大同埋難忘嘅時刻。
回憶返當佢成功撲救阿巴咸嘅十二碼之後嘅慶祝情況，阿祖安話：「當時我跪喺地下度，只係等待隊友嚟到我身邊，連領隊都嚟埋，大家都好開心，喺度跳。」
「我要睇返相關嘅視像，因為我睇到好多人跳到我身上，但係呢個係我人生中，值得銘記嘅美好時刻。」
阿祖安嚟到利物浦咁快就有機會上陣，當然係因為艾利神小腿受傷，需要抖幾個星期所致。
但係個性質係，門將之間嘅關係嚟講，必需要包括咗競爭同埋互相尊重嘅一種組合，以便能夠互相激發對方，去做到最好。
從艾利神喺賽前發送俾阿祖安嘅體貼關心嘅短訊，可見佢哋之間初步建立咗嘅良好關係。
對於呢個情況，阿祖安話：「作為門將嘅生涯就係咁，我哋需要為所有嘅嘢做好準備，同埋我知道艾利神上季喺球會同國家隊都表現良好。」
「但係我嚟呢度，係要同佢競爭一席正選位置，同埋推動佢。呢個係一個健康同良性嘅競爭，對我哋兩個都係好事，對球會亦然，並且能夠令我哋變得更好。」
「艾利神喺賽前嘅下午，發送咗訊息俾我。佢話：「朋友，祝你好運。」我回覆咗話：「好多謝你。」。佢真係非常友好，同艾利神共事，我感到非常舒服，同埋我希望佢早日康復。」
文章出處：利物浦官網
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
