Paul Joyce：羅馬斟介路夫蘭 | Liverpudlian Ty
根據 Times Sport 記者 Paul Joyce，意甲球會羅馬就羅致克羅地亞中堅洛夫雲（Dejan Lovren）嘅事宜，與利物浦進行會談。
據了解，利物浦現時索價 £15M，達成協議係有可能嘅，洛夫雲本身亦都知道，佢係球會嘅第四中堅。
洛夫雲現時同利物浦餘下兩年合約，周薪大約 £100,000 左右。佢喺 2017 年簽下一份為期 4 年嘅合約，利物浦亦有將呢個合約關係增加多一年嘅選項。
利物浦喺對諾域治嘅英超開鑼戰大勝 4-1，但係洛夫雲並冇喺大軍之中。
上個球季嘅下半季，祖爾馬迪普（Joel Matip）夥拍雲迪克（Virgil van Dijk）嘅表現出色，令到洛夫雲冇乜機會上陣。同時，祖高美斯（Joe Gomes）亦被視為利物浦將來後防中路嘅核心球員。如果洛夫雲確定離隊，法賓奴、賀化及雲丹貝治都可以頂替其位置。
意甲轉會窗會喺 8 月 23 日結束，即係話，現時仲有 10 日左右去完成轉會交易。
另外，由於正選門將艾利臣小腿受傷，要抖幾個星期，愛爾蘭年青門將基列夏自從手腕受傷後，剛剛恢復操練，未必能夠趕及復出；青年軍門將查路斯仍在養傷之中，而波蘭門將加巴拉亦都借往英冠嘅赫德斯菲。喺咁嘅情況下，門將位置嘅人手比較短缺。因此，利物浦最終決定羅致自由身門將朗拿根（Andy Lonergan），合約為期 1 年。
利物浦羅致朗拿根之後，令到呢位現年 35 歲嘅門將，喺歐洲超級盃，可以成為西班牙門將阿祖安嘅後備。
朗拿根今夏有份隨隊參與美國之旅，喺對西維爾嘅友賽上陣，本身亦曾效力多間球會，當中包括普雷斯頓及列斯聯等球會。
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
