FSG已出售Melwood訓練場地段 | Liverpudlian Ty
利物浦宣佈，可負擔房屋（Affordable House）供應商 Torus 收購咗球會 Melwood 訓練場嘅地段。
Torus 係非牟利嘅慈善信託基金，佢哋喺英國 West Derby 地區擁有 1,600 個住宅物業，並且喺西北部管理大約 40,000 個社會房屋，營造可持續發展及繁榮嘅社區。
Torus 會為 Melwood 場地作出發展計劃，並且亦將會諮詢當地嘅社區人士，以便從中收集當地居民及企業嘅意見。
喺 2017 年，利物浦得到 Melwood 重建計劃嘅規劃許可，成為投資喺 Kirkby 興建一個為球會一隊與青年軍嘅全新、一流訓練設施計劃嘅一部份。
經過招標過程，Torus 被認為係最具社會責任嘅房屋發展商，去接收呢塊喺 Melwood 嘅地皮。
位於 Kirkby 嘅新訓練場地，已經喺 2018 年夏天開始動工，工程預料會喺 2020 年夏天完成。球會嘅一隊球員將於 2020-21 年球季，使用位於 Kirkby 嘅新訓練場地及設施。
利物浦營運及財務執行副總裁 Andy Hughes 表示：「今日係標誌著呢個相當重要及具野心嘅項目，邁向另一個重要嘅里程碑。」
「我哋懷著沉重嘅心情宣佈，出售 Melwood 嘅呢塊地。呢個地方喺球會嘅歷史上，發揮重要嘅作用。但係場地嘅空間有限，無法滿足球會對擁有全新及一流嘅綜合訓練設施嘅志向與雄心。」
「由開始進行呢件事，至今已經超過兩年。我哋想感謝所有參與其中嘅人士，特別係 West Derby 嘅當地居民。佢哋喺招標過程中，提供意見及具有耐性。」
「出售 Melwood 地段所得嘅全部資金，會投資返喺球會一隊及喺 Kirkby 最先進嘅新訓練中心。」
利物浦及 Torus 都知道，Melwood 喺球會嘅歷史中，發揮重要嘅作用，並將於當地居民合作，以確保 Melwood 嘅歷史遺產，繼續成為未來計劃嘅一部份。
Torus 常務董事 Chris Bowen 表示：「我哋喺該地區有 1,600 個住宅物業，已經長期植根於 West Derby 社區。所以，被選中去發展呢個地段，對我們嚟講係意義重大。」
「諮詢當地居民，對我哋嚟講係非常重要，我哋期待喺適當時候與社區人士進行會面。此外，我哋亦都會同利物浦緊密合作，確保呢個充滿歷史遺產、極具歷史價值嘅地方，由始至終地繼續成為社區嘅一個主題。」
「我哋嘅計劃仍然處於一個比較早期嘅階段，但係會透過提供優質嘅可負擔房屋，解決當地嘅需求，包括為老年人及需要額外照顧嘅人士，能夠有社交、充實及獨立嘅生活。」
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
