由確認升班嗰一刻計起截至今日，阿士東維拉已經喺轉會市場買入咗十二個球員，佢哋分別係：
龍門 Tom Heaton
左閘 Matt Targett
中堅 Tyrone Mings
中堅 Bjorn Engels
中堅 Kortney Hause
中堅 Ezri Konsa
防中 Douglas Luiz
防中 Marvelous Nakamba
翼鋒 Anwar El Ghazi
翼鋒 Trezeguet
翼鋒 Jota
前鋒 Wesley
基於部分球員嘅交易冇公佈價錢，所以維拉實際洗咗幾多大家都係靠估，不過一致都認為，佢哋已經至少洗咗一億英鎊擴軍。
一億英鎊，即係約十億港紙，大概買到啲乜？
1. 元朗國行人天橋 約十七份之十條（2018年價，[註1]）
2. 曼聯普巴 乙個 （2016年價）
3. 富咸18/19降班陣容球員 10+個
好似都係物非所值唔慌好嘢，尤其係同上季都係只憑附加賽升班嘅富咸情況相似，亦因為咁，令到好多人覺得維拉係複製緊富咸上年條雖豪洗但降班之路……
又未必嘅。
至少有兩點，筆者覺得維拉係比富咸做得好：
1. 早知道你有法寶 要砌梗係砌舊相好
Mings、Hause、El Ghazi三個其實上季已經喺維拉陣中，而家只不過係正式購入；Konsa、Jota、仲有外借回歸嘅前鋒Scott Hogan之前都有同領隊Dean Smith喺英冠球隊賓福特共事過，所以好多「新球員」其實都已經踢慣踢熟，雖說冇令到球隊實力明顯增強，但起碼唔係成隊正選十一人重頭砌過。反觀上季嘅富咸，買入嘅球員只有前鋒Mitrovic屬於借將回購。喺呢一點嚟講，維拉絕對穩陣過富咸。
2. 早買早享受 遲買唔止貴幾舊
距離開季第一場仲有一個星期，相信維拉已經買夠人夠鐘收韁。而上年富咸有唔少係臨轉會窗收工先買入嘅panic buy，買貴唔少之餘，更傳出貴價貨如Seri根本唔想加盟。喺倉卒成軍嘅情況下，富咸自然難以踢出好成績。
講到咁樂觀，係咪包保成績好先？唔想講「只要開季開得好就好大機會留到級」等嘅廢話，我講一點應該冇乜人留意到嘅：
能否做出好成績，視乎有冇好好照顧新球員，尤其是係球隊史上最貴前鋒Wesley。
Wesley出身於巴西貧民區，做過苦工，父親早逝，而自己亦都喺非常年輕嘅時候已經當上老豆，種種原因令佢非常保護自己，脾氣亦都相當暴躁，剛剛去到比利時踢波嘅時候，每每俾人激親就一踭批落對手度，食咗唔少紅牌。好彩嘅係布魯日嘅職員同球迷都好住佢，令佢終於喺上季大放異彩，仲做埋比利時最佳年輕球員。
偏偏維拉又有疏忽照顧新球員嘅前科。最經典嘅係15/16球季，亦都即係降班嗰年簽入嘅中場Veretout，話說當年呢位法國球員喺加盟時老婆咁啱生咗BB，但維拉冇幫手安頓，只安排球員成季暫住酒店，搞到佢頻撲非常。更可憐嘅係，維拉安排咗呢位完全唔識英文嘅法國球員喺聖誕節嘅時候探訪伯明翰嘅小朋友，搞到雙方都唔知大家喺度做乜勁，情況非常尷尬。當年新加盟嘅仲有而家已經當上PSG一線巨星嘅防中Gueye，一嚟到已經講明當維拉係踏腳石，再加上本土球員米卡理察士、艾邦拉荷同基利殊等又唔生銹俾人影到party like hell，最終維拉因管理不善而在英超聯賽排名榜節節下跌最終以第尾降班收場。
維拉要護級、甚至想喺競爭日趨激烈嘅英超更上一層樓，睇嚟並不需要向富咸借鏡，反而係要睇睇幾年前嘅自己，好好照顧平均年齡非常之低嘅新球員，以免重滔覆轍。
[註1] 元朗天橋造價參考
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
