賀化簽長約留效利物浦｜Liverpudlian Ty
利物浦宣佈，現年 17 歲嘅荷蘭後防新星賀化（Ki-Jana Hoever），簽下一張新嘅長約，呢份亦係佢嘅第一份職業球員合約。
賀化向利物浦官方媒體表示，對簽署呢份合約感到高興。佢話：「我需要現實一啲，希望今年能夠喺一隊得到一啲出場嘅時間。當然，我知道將會可能踢 U23 嘅賽事會較多。我將會同一隊嘅球員一齊努力地訓練，展現我能夠做到嘅嘢。如果有機會上陣嘅話，我會準備就緒，呢個就係我所希望嘅嘢。」
「我仍然需要學習好多嘅嘢，我宜家只係 17 歲，所以我需要繼續努力，改進自己。」
「球會對我相當信任，令我簽下呢份新約。我會嘗試令佢哋感到驕傲，並且表現出我能夠為呢間球會做到啲乜，並且希望嚟緊唔會係我喺利物浦嘅最後幾年。」
賀化喺今夏踢足利物浦 6 場嘅季前熱身賽。佢喺 2018 年 9 月，由荷甲球會阿積士加盟利物浦，冒起甚速，喺上季對狼隊嘅足總盃賽事，佢後備入替，首次正式為利物浦上陣。當時佢嘅年紀只有 16 歲零 354 日，係利物浦球會史上第三位最年輕嘅首次出賽球員。
賀化本身亦係荷蘭 U17 國腳，亦係利物浦 U23 嘅常規正選。
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
