佳尼前十字韌帶受傷抖半年｜Liverpudlian Ty
利物浦右閘佳尼（Nathaniel Clyne）因前十字韌帶受傷，將要抖大約 6 個月。
現年 28 歲嘅佳尼，預料會喺今夏離隊，但係宜家可能會比較難吸引到「追求者」。
佳尼喺利物浦以 2-3 不敵多蒙特嘅熱身賽中受傷，佢有隨隊前往波士頓，但係起初出現腫脹，並且經過檢查後，確認受傷，佢會由波士頓飛返利物浦。
利物浦隊醫對佳尼嘅受傷持樂觀態度。但係，因為冇額外嘅傷害，預料佳尼要抖 6 個月，而唔係通常需要嘅 9 個月時間。
利物浦領隊高普（Jurgen Klopp）向球會官方媒體表示：「我哋都為佳尼受傷，感到失望同埋傷感，我可以講啲咩呢？佢喺操練同出賽嘅表現咁好，佢嘅狀態係好好嘅。」
「對於任何球員嚟講，有呢類傷患，明顯地唔會係一個開心嘅時刻。但係根據醫療團隊，呢個係前十字韌帶受傷。咁即係意味著，由康復到復出，當中係要經過一條期間冇任何狀況出現嘅路。」
「呢個時候，都冇更多嘅嘢可以講，我哋全體都會盡力支持佳尼，我哋期待能夠見到佢可以盡快返回球場上。」
「佢係一個專業，並且亦係一個強壯嘅球員，呢啲都係佢嘅優點。」
呢次受傷，令到佳尼喺利物浦嘅將來變得不明朗。
佳尼同利物浦嘅合約已經踏入最後一年，佢嘅正選右閘位置，已經被阿歷山大阿諾所取代。
喺 2018-19 年球季嘅上半季，佳尼只為利物浦上陣 4 次。及後於下半季，借往般尼茅夫。佢外借般尼茅夫期間，上陣 13 次，協助該英超球會以第 14 名完成球季。
之前曾經有報道話，有其他英超球會想喺今季借用佳尼，其中包括佳尼嘅前球會水晶宮。
但係有關其他球會想引入佳尼嘅舉動，可能要擱置喇，因為佢現時需要時間康復，務求盡快能夠喺今個球季上陣。
佳尼喺 2015 年，由修咸頓加盟利物浦。佢喺頭兩季，係球隊嘅正選右閘。但係喺 2017-18 年球季，佢受到背傷困擾，及後阿歷山大阿諾嘅冒起，令佢失去正選位置。
利物浦將會喺星期三，於紐約踢最後一場嘅美國之旅賽事，對手係葡超球會士砵亭。
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
