高普：古天奴回歸紅軍嘅機會係零｜Liverpudlian Ty

根據 Melissa Reddy，現時身處紐約嘅高普（Jurgen Klopp）告知 ESPN FC，佢已經排除咗巴塞隆拿中場球員古天奴（Coutinho）重返利物浦嘅可能性，並且希望佢能夠喺巴塞隆拿「尋找自己嘅空間與運氣」。

27 歲嘅古天奴，喺 2018 年 1 月，以 £142M 轉會費，由利物浦轉投巴塞隆拿，成為巴塞隆拿歷來最貴價簽入嘅球員，但係發覺自己要喺呢隊西甲冠軍站穩正選係非常困難，同埋仍然未得到球迷嘅肯定。

巴塞隆拿已經想將古天奴放走，佢嘅經理人祖拉捷恩（Kia Joorabchian）更指責該西甲球會，關於古天奴喺球會前景嘅訊息並不一致。

古天奴要求離開利物浦之前，包括喺 2017 年夏天正式要求轉會巴塞隆拿，佢喺利物浦渡過開心嘅 4 年半。所以利物浦被傳同佢扯上關係，係顯而易見嘅結果。

利物浦領隊高普對古天奴嘅為人同埋作為球員，都給予高度嘅讚揚，不過佢唔會以大筆嘅費用再次將佢簽下。

高普喺紐約接受 ESPN 獨家專訪時表示：「基本上，古天奴仍然能夠幫助世上任何一隊球隊，呢個係 100% 肯定。」佢話：「我喜歡古天奴，我認為佢係一位出色嘅球員，但係呢個會係一個大、大、大、大、大、大、大、大額金錢嘅轉會，同埋呢個唔係我哋去做呢啲事情嘅年頭。」

「呢個係冇可能嘅。正如我之前講過，古天奴仍然能夠幫助任何一隊球隊變得更好，包括我哋，但係我真係希望佢能夠喺巴塞隆拿搵到自己嘅空間同埋運氣。」

「或者佢可能會搵到呢。我哋有聯絡，但唔係緊密到我知佢實際上做緊啲乜，其他嘅就係關於報章嘅報道之類嘅嘢。」

「如果報章過往寫我嘅所有嘢都係真嘅話，嘩！假如寫關於我嘅內容係相近的話，我會話佢喺巴塞隆拿好開心，仲想簽一份 6 年合約之類嘅嘢。」

據了解，利物浦冇考慮借用古天奴。佢喺 2013 年 1 月，以 £8.5M 轉會費，由意甲球會國際米蘭加盟利物浦。

利物浦今夏喺轉會市場預料唔會咩特別嘅動作，以留住現有球員為首要。

利物浦今日喺紐約會踢埋最後一場嘅美國之旅賽事，對手係葡超球會士砵亭。

如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。

Liverpudlian Ty