正在為新球季作好準備嘅利物浦，開始佢哋嘅美國之旅。紅軍首先會喺印第安納嘅 Notre Dame Stadium 對多蒙特。領隊高普及隊長軒達臣出席賽前記者招待會，主要內容如下：
1. 關於上季成為歐聯冠軍，軒達臣表示：「對我哋嚟講，呢個係球隊嘅一大成就，係特別嘅時刻。亦都俾我哋嘗試成功嘅滋味，我哋想要更多。」
2. 軒達臣話：「我哋每一季都有改善同埋進步，我哋羅致嘅球員、陣容嘅強大、球員嘅進步，我哋要繼續學習。對於球隊嘅陣容，我好有信心。」
3. 利物浦成為歐聯冠軍，宜家要展望將來，軒達臣發出咗明確嘅訊息。佢話：「足球係轉變得好快嘅。對於我哋作為一隊球隊，我哋要適當地以馬德里嘅勝利去保持對錦標嘅飢渴感，同埋要一齊取得更多嘅成功，我哋希望盡可能地取得成功。」
4. 講到張伯倫，軒達臣表示：「我同佢相熟，並且多年來同佢並肩作戰。上季嚟講，佢喺球場外所做嘅事，對我哋好重要。佢喺球隊中經常都好正面，經常都同我哋一齊。喺今個球季，我希望佢喺球場上擔任重要嘅角色。」
5. 關於高普喺歐聯四強次回合對巴塞隆拿嘅賽前講話，軒達臣話：「佢當時講咗一啲說話 …… 佢話：「如果呢隊係世上任何一隊球隊嘅話，我哋唔會有機會，但係因為係你哋，所以有機會。」喺呢個時刻開始，所有人都有特別嘅感覺，同埋有信心。」
6. 拉蘭拿踢 6 號位，軒達臣認為：「拉蘭拿擔任呢個位置，無論喺操練定係比賽上，都表現得好好。佢係一位出色嘅球員，能夠勝任任何位置。佢踢呢個位置，能夠為球隊帶來一啲唔同嘅嘢。佢接應來球嘅方法，同埋作出嘅傳送等等，佢享受其中。 」
7. 至於自己踢 8 號位，軒達臣話：「呢個視乎領隊嘅決定，我能夠踢 6 號位同埋 8 號位。對我嚟講，呢個只係關於喺特定嘅日子，喺咩地方需要我。上季喺位置上踢前一啲，我係感到享受嘅，但係踢呢兩個位置，其實我都享受其中，我會去做領隊要我哋做嘅任何事情。」
8. 被問到想執教利物浦幾耐時間，高普回應：「至少三年！」
9. 高普對雲丹貝治嘅第一個印象睇嚟唔錯，佢話：「一個球員企喺我面前，仲要高過我嘅，真係並唔常見！尤其是當佢只係 17 歲，仲係成長之中，佢係一位擁有優厚天份嘅球員。」
10. 高普話曼城仍然係英超冠軍嘅大熱門，佢補充：「我哋會追趕佢哋。如果唔係我哋俾到壓力嘅話，我唔認為佢哋上季會攞到 98 分。」
11. 高普話：「唔係所有人都想聽到嘅，但係愛華頓已經增強咗，同埋羅致咗一啲好球員。」
12. 被問到雲迪克，高普話：「所有關於佢嘅嘢都已經講晒，但唔係太多人會問到祖爾馬迪普喺上季所發揮嘅作用。世上唔係太多中堅會好似佢咁冇犯錯，雲迪克負責組織喺球場上嘅事情，係一個唔錯嘅引援。」
13. 講到占士米拿，高普表示：「佢可以成為一位田徑教練！占士米拿，呢個球員真係好重要。佢嘅性格、天賦，所有嘅嘢，都喺最高嘅水平。只有喺體育運動之中，你先至會話一個 33 歲嘅人係老將！佢嚟緊仲有美好嘅幾個年頭。」
14. 高普話，占士米拿「喜歡發問同埋討論事情」，會想「知道點解我哋要做呢啲嘢」。不過佢話「對一個教練嚟講，係好事嚟。」
「我唔知道四年前啲人點樣睇佢，但係簽下佢係一個好主意嚟。如果冇一個好似占士米拿咁樣嘅球員，係冇可能獲得成功嘅。」
15. 被問到嚟緊球季要爭奪 7 項錦標 (包括社區盾)，同埋點樣去安排同埋善用手上嘅球員，高普表示：「球賽嘅數目好似好多！但係我哋從來唔會去嘗試逃避或者避免比賽，因為呢個情況係表示我哋有一個成功嘅球季。一如以往，聯賽會係主要嘅焦點。」
16. 對 Notre Dame Stadium 有咩睇法呢？高普話：「你想要一個誠實嘅答案，定係一個禮貌嘅回應？呢度所有嘅嘢都好 …… 除咗個球場。」
