離開巴塞？古天奴IG露出端倪｜Liverpudlian Ty
現時效力巴塞隆拿嘅巴西中場球員古天奴（Countinho），佢嘅去向近日備受關注。佢喺今個夏天已經同唔少球會扯上關係，包括佢嘅前球會利物浦。
宜家喺網上熱傳，話古天奴個 Instagram 嘅自我介紹，冇咗巴塞隆拿喎，於是產生咗無盡嘅遐想。
但係，根據 Liverpool Echo 嘅報道，喺古天奴嘅 Instagram，似乎從來都冇將佢現時效力嘅球會，加喺自我介紹之中。從以下分別喺 2018 年 1 月 29 日、2018 年 9 月 23 日、2019 年 4 月 18 日、2019 年 5 月 24 日同埋 2019 年 6 月 16 日嘅附圖，都發現喺佢嘅 Instagram，係冇提及現時效力球會嘅名字。
喺 2018 年 1 月，以 £142M 轉會費，由利物浦轉投巴塞隆拿嘅古天奴，一直都與唔同嘅球會「扯上關係」，當中包括曼聯、巴黎聖日耳門同埋利物浦。但係呢三間球會，現時都冇明確嘅跡象顯示想將佢羅致。
被問到古天奴重返英超聯賽嘅機會，經理人祖拉捷恩（Kia Joorabchian）表示：「對古天奴嚟講，為利物浦嘅敵對球會效力，會係非常困難嘅，因為佢對利物浦仍然感到有一種好濃厚嘅感情同埋親和力。」
「當時佢喺利物浦嘅時間係好美妙嘅。」
