Melissa Reddy：奧歷治接近與紅軍續約 | Liverpudlian Ty
根據 Melissa Reddy，利物浦樂觀地認為，剛返回 Melwood 嘅奧歷治（Divock Origi）將會接受佢哋所開出嘅續約條件。
奧歷治同利物浦嘅合約只係剩番 1 年，喺星期一返回 Melwood，並且表示希望能夠喺協助利物浦爭標嘅路上，發揮更大嘅作用。
佢喺歐聯決賽射入致勝入球，協助利物浦以 2-0 擊敗熱刺，成為歐聯冠軍，亦係高普執教利物浦以來嘅首個錦標，並且係利物浦史上第 6 個歐聯冠軍。喺歐聯四強對巴塞隆拿，奧歷治亦都產生關鍵作用，個人梅開二度，令利物浦喺次回合，於主場大勝 4-0，昂然晉身決賽。
據了解，續約談判進展良好。奧歷治知道，喺嚟緊嘅球季有唔少賽事，加上費明奴喺夏天剛踢完美洲國家盃、沙拿及文尼亦有份踢非洲國家盃，令到佢會有更大嘅機會為利物浦上陣。
奧歷治選擇自己喺利物浦把握機會，並再次證明自己嘅重要性。正如上個月透露，利物浦今夏唔會將奧歷治出售，即使佢唔續約。
球會唔想將佢出售套現，對奧歷治嚟講亦係一個正面嘅因素，佢同 FSG 主席米高哥頓及體育總監米高愛華士有緊密嘅關係。後者過往不斷拒絕平價出售奧歷治，並且相信呢位比利時前鋒對球隊會有重要嘅貢獻。
留住奧歷治呢個做法，再次印證咗利物浦以留住球員為先，而唔係對現有人腳進行大改造嘅政策。張伯倫、占士米拿及祖爾馬迪普預料會延長合約。此外，由修咸頓加盟利物浦只有 18 個月嘅雲迪克亦都告知球會，佢想簽署一份新約。
利物浦擊敗一眾歐洲列強，羅致年僅 16 歲嘅富咸年青中場新星哈維艾利洛（Harvey Elliott）。巴黎聖日耳門、巴塞隆拿、皇家馬德里、多蒙特及 RB 萊比錫一直都有留意住佢嘅情況。佢喺 5 月首次喺英超聯賽上陣，成為英超史上最年輕嘅出賽球員。
另外，沙基利（Xherdan Shaqiri ）嘅受傷，對利物浦喺季前嘅準備係一個打擊。呢位瑞士國腳嘅小腿肌肉有撕裂情況，需要抖「一段時間」。
沙基利喺星期一返回 Melwood，佢嘅傷患喺 6 月 9 日，瑞士對英格蘭嘅歐洲國家聯賽中受傷嘅，利物浦醫療團隊已對佢嘅傷勢作出評估。
利物浦領隊高普向球會官方網站表示：「沙基利喺國家隊返嚟，佢仍然受傷。佢嘅小腿肌肉有撕裂嘅情況，所以有一段時間佢唔能夠上陣。」
沙基利現時同拿比基達（Naby Keita）一樣未能候命。後者為畿內亞國家隊踢非洲國家盃期間，內收肌有少少拉傷，現正治療及康復之中。
