里爾主席：利物浦的確有接洽尼高拉斯柏比 | Liverpudlian Ty
雖然一直被否認，但係法甲球會里爾主席謝列特盧比斯（Gerard Lopez）接受法國媒體 RMC Sport 記者 Mohamed Bouhafsi 嘅獨家專訪，講到柏比（Nicolas Pepe）及利物浦嘅事宜。盧比斯亦表示，佢都有同其他球會傾過。
里爾主席謝列特盧比斯，講到柏比嘅最新情況。佢話喺非洲國家盃開始之前，已經接獲兩個關於柏比嘅報價。同時佢亦表示，利物浦有同球員本身傾過。
究竟柏比下季會去邊間球會呢？根據 RMC Sport，關於現年 24 歲，今夏為科特迪瓦踢非洲國家盃嘅柏比嘅爭奪戰方面，利物浦現正處於比較理想嘅位置。里爾主席謝列特盧比斯確認，利物浦有接觸過上季喺法甲聯賽射入 22 球嘅柏比。
里爾主席謝列特盧比斯表示：「我知道係有同球員傾過，但唔係同球會。利物浦喺呢啲位置有球員去踢，同埋我睇到話可能有啲球員會走。不過，我唔係特別注意利物浦嘅情況。不過有樣嘢係正確嘅係，佢哋亦有同球員嘅經理人傾過。」
此外，喺上個轉會窗，德甲球會拜仁慕尼黑亦有作出接洽。謝列特盧比斯話：「呢個係喺上個冬天，喺市場上並冇發生太多嘅事情，柏比係一位好特別嘅球員。」
關於柏比嘅踢法特點，同埋會去邊間球會，謝列特盧比斯話：「柏比可以踢 9 號位，但係呢個並唔係佢最喜歡嘅位置。佢經常會利用自己嘅速度，但係如果你踢 9 號位嘅話，咁就唔會有好多空間俾你施展自己嘅速度。柏比係一個翼鋒，但係佢好似一個 9 號球員咁，擁有入球觸覺同埋能力。現時踢呢個位置嘅球員，有呢啲特點嘅，並唔係咁多。現今嘅球會都會有好戰術性嘅考慮，好多時會諗，點樣將柏比融入球隊之中？喺市場上，好似柏比呢類嘅球員並唔係咁多，尤其是係佢呢個年齡嘅。至於柏比會加盟邊間球會，要睇球員自己嘅意願、對佢有意嘅球會方面嘅意願、該些球會領隊方面嘅說話，解釋球隊嘅情況，甚或其他嘅情形等等。相信嚟緊事情仲會有一啲頗為實質嘅發展，我哋拭目以待。」
另外，謝列特盧比斯亦都透露，喺柏比前往埃及，征戰非洲國家盃之前，里爾已經接獲兩個關於呢位科特迪瓦國腳嘅報價。佢話：「喺非洲國家盃之前，我哋接獲兩個報價。喺非洲國家盃之後，我哋拭目以待。當時我嘅立場係，睇吓喺非洲國家盃之前能否做到一啲嘢，事關喺非國盃之前，我有來自兩間球會嘅報價。不過，本身同我哋有良好關係嘅經理人方面，想我哋俾多少少時間去睇吓其他嘅選項，所以呢樣嘢唔係球會單方面講就算嘅，球員方面當然可以有佢嘅喜好。喺非洲國家盃開始期間，柏比表示，自己置身於一個咁嘅賽事之中，兼且仲要諗其他嘢，係好複雜嘅。呢個係一個重要嘅球員生涯嘅選擇，佢正在面對進行緊嘅賽事，我哋亦都同領隊同埋經理人等人士討論過之後，我哋同意將柏比轉會嘅事宜等到非洲國家盃結束後處理。」
外間講到柏比嘅高昂轉會費，但係里爾會喺乜嘢價位先至會將柏比出售呢？謝列特盧比斯表示：「呢個係由市場決定，我從來冇喺訪問中話要索價 €80M。喺一次嘅訪問中，我話 €40M 至 €80M，呢個係一個笑話嚟，我哋觀望最終會喺乜嘢價位度落墨啦。呢個肯定係一個重要嘅轉會，亦都必需係喺競技層面上，對球員有利嘅轉會。」
最後，盧比斯喺較早前被問到關於巴黎聖日耳門可能對柏比有興趣嘅傳聞，呢間法國首都球會已經為柏比作出咗報價？佢嘅回應係：「呢個並唔係我所知道嘅。」
出處：
RMC
