富咸中場新星有望成紅軍今夏第二簽 | Liverpudlian Ty
根據 The Telegraph 嘅 Sam Wallace，現時效力富咸嘅年青中場新星哈維艾利洛（Harvey Elliot），勢將加盟利物浦。
本身係英格蘭 U17 國腳嘅哈維艾利洛，係英超聯賽歷來最年輕嘅出賽球員。佢拒絕咗富咸嘅學徒合約，有唔少歐洲大球會對佢有興趣。
哈維艾利洛要去到嚟緊嘅 4 月，先至踏入 17 歲。佢要成為職業球員嘅話，就要等到 17 歲。有唔少英超球會對佢有興趣，另外仲有皇家馬德里、巴黎聖日耳門及 RB 萊比錫。佢同富咸嘅學徒合約喺 6 月就會完結，並且決定會喺今個月加盟利物浦。
哈維艾利洛係英格蘭國內其中一位評價最高嘅 16 歲球員，富咸同利物浦需要就補償方案達成協議。
有唔少歐洲球會對呢班喺 2003 年出生嘅英格蘭 U17 國腳有興趣，除咗哈維艾利洛之外，佢嘅國家隊隊友，現時效力西布朗，16 歲嘅路易巴利，亦都得到巴塞隆拿及巴黎聖日耳門嘅青睞。同佢一樣都係炙手可熱嘅國家隊隊友一樣，哈維艾利洛會得到嘅合約條件，會係當佢踏入合適嘅年齡，就會轉為職業球員合約。一位 17 歲嘅球員，簽下職業球員合約嘅話，合約最長年期為 3 年。
富咸青訓學院近年喺培育年青球員方面，係相當成功。佢哋喺 2015 年，將當時 18 歲嘅英格蘭小國腳翼鋒柏德烈羅拔斯售予曼城，轉會費 £12M。此外，現年 19 歲嘅賴恩施斯隆，預料於今夏轉投英超球會。
哈維艾利洛喺上年 9 月嘅英格蘭聯賽盃賽事，首次為富咸上陣，當時佢嘅年齡只有 15 歲零 174 日，係球會一隊史上最年輕嘅首次上陣球員。
喺 5 月份，對狼隊嘅英超聯賽，當時只有 16 歲零 30 日嘅佢，喺賽事尾段後備入替，打破咗之前另一位富咸球員 Matthew Briggs 嘅紀錄。
富咸曾經希望給予哈維艾利洛快速晉升為一隊球員嘅承諾，會令佢願意繼續留隊，但係已經被佢拒絕。
