根據 James Pearce，兩名巴西國腳：艾利臣及費明奴，喺美洲國家盃決賽之後，將會可以好好咁休息。佢哋喺球會同國家隊嘅頻密賽程，將於美洲國家盃決賽之後告一段落。
另外，根據前利物浦官網記者，現時於 London Evening Standard 任職嘅 David Lynch，喺上季尾受傷，及後為畿內亞國家隊踢非洲國家盃時再度受傷嘅利物浦中場球員拿比基達，將唔會再參與餘下嘅非洲國家盃賽事。
利物浦領隊高普預料會俾兩位巴西國腳休息三個星期，亦即係話，佢哋唔會參與球隊嘅季前操練直至 7 月尾。佢哋唔會喺對燦美爾及巴拉福特嘅季前熱身賽，同埋對多蒙特、西維爾及士砵亭嘅美國之旅中上陣。
艾利臣及費明奴會加入利物浦喺法國進行嘅季前集訓營，當中包括喺 7 月 31 日，喺日內瓦對里昂嘅季前熱身賽。
報道話，相信佢哋會有足夠時間趕及喺 8 月 4 日對曼城嘅社區盾賽事候命。
艾利臣及費明奴喺美洲國家盃嘅表現出色，協助巴西喺四強以 2-0 擊敗阿根廷，晉身決賽。
其中艾利臣更加係球會同國家隊賽事，合共連續 9 場賽事不失球。呢位利物浦嘅首席門將，自從喺 5 月 4 日，聯賽贏紐卡素 3-2 之後，都未失過波。
費明奴喺美洲國家盃四強對阿根廷嘅賽事，近門射入一球，協助主辦國巴西晉身決賽。佢喺賽事中，取得兩個入球，3 個助攻，係今屆賽事直接參與最多入球嘅球員。
拿比基達喺星期日已飛返默西塞特郡，就其大腿傷患作出評估，佢喺 4 日前為畿內亞國家隊上陣時受傷，最終亦都不敵尼日利亞。
上述傷患令拿比基達喺非洲國家盃最後一場分組賽未能上陣，結果畿內亞以 2-0 擊敗布隆迪。但係，之前仍然希望佢能夠喺淘汰賽階段上陣。
但係，喺 Melwood 檢查過後，發現拿比基達嘅傷患，唔能夠喺對阿爾及利亞嘅非洲國家盃十六強賽事中為國家隊披甲。即使畿內亞能夠繼續晉級，都唔能夠上陣。
拿比基達喺 5 月份，歐聯對巴塞隆拿嘅時候，內收肌受傷，因而提早收咧，呢件事令到利物浦及畿內亞足總出現爭拗。
利物浦領隊高普起初表示，拿比基達無法喺非洲國家盃，為畿內亞國家隊上陣，但係畿內亞足總方面好快就作出反駁。
雖然係咁，但係畿內亞國家隊主教練 Paul Put 喺星期二話，對利物浦喺希望令拿比基達能夠返回埃及參與非洲國家盃賽事嘅跟進及處理表示讚賞，佢仍然希望拿比基達可以復出。
Paul Put 向 BBC 表示：「我有個感覺係，利物浦想拿比基達踢非洲國家盃，同埋佢喺利物浦有沙拿同文尼做隊友，呢樣嘢都係重要嘅。」
「呢個對佢嚟講亦都係一種壓力，同埋我感覺到佢係想要呢啲壓力，因為當佢返去利物浦嘅時候，佢一直都好努力。佢真係相當努力，並且不斷地推動自己。」
「但係傷患仍然存在，同埋如果仍然感到不適，唔係 100% 感覺良好嘅話，仲要佢上陣係唔合情理嘅，尤其是呢啲高強度嘅賽事，所以我諗要等待，同埋睇吓個檢查結果係點。」
雖然拿比基達受到傷患影響，但係利物浦預料，佢可以參加球隊嘅季前準備。
