約翰亨利：利物浦劍指下季英超冠軍 | Liverpudlian Ty
喺倫敦睇波士頓紅襪比賽嘅利物浦班主約翰亨利，透露嚟緊球季嘅目標同埋講到球員轉會事宜。
佢強調球會嘅「焦點」係贏取英超聯賽冠軍。
利物浦喺上季嘅聯賽，只有 1 場賽事落敗，喺相當緊湊嘅爭標過程之中，最後僅以 1 分之差不敵曼城，與聯賽冠軍擦身而過。
喺季尾奪得歐聯冠軍，令到剛過去嘅球季不至於要以失望作為終結，但係約翰亨利知道，利物浦球迷宜家相當渴望能夠得到自從 1990 年以來，第一個聯賽冠軍。
約翰亨利向 Press Association 表示：「對我嚟講，贏得歐洲冠軍係比成為英格蘭冠軍更為重大，但係我認為球迷真係好想贏到後者。我知道我哋會將焦點放喺贏取下年嘅英超聯賽錦標。」
現時身處倫敦，去睇佢嘅波士頓紅襪隊喺英國，進行對紐約洋基隊嘅首場 MLB 常規賽嘅約翰亨利，被問到利物浦喺簽入荷蘭年青後衛雲丹貝治之後，會否有其他轉會嘅動作，佢對此三緘其口。
約翰亨利被問到加强球隊實力嘅方法時，佢話：「我哋需要健康。」
「我哋需要張伯倫返嚟，我哋需要一個健康嘅拉蘭拿。」
「呢個唔係視乎我，但係我會估計，我哋喺下年會多啲見到奧歷治。我認為佢為球隊俾到一啲特別嘅嘢，佢有力量同速度，同埋帶來入球。」
「我對下年嘅感覺非常好。」
喺上季聯賽冠軍嘅爭逐，最後以失望作結，約翰亨利表示，領隊高普有充份嘅理由去為佢哋嘅賽季感到驕傲。
約翰亨利話：「我哋球隊上下，由球季嘅第一日到最後一日，都付出佢哋嘅所有。呢個係一個漫長嘅球季，佢哋展現自己嘅能力，同埋付出咗好多嘅努力。」
「無論對手係邊隊都好，佢哋都能夠超越所有嘅對手，同埋我覺得佢哋係值得擁有一個獎盃。」
「我哋最後能夠贏到一個最重大嘅錦標，所以我非常高興。」
