古積來季繼續留效哈化柏林 | Liverpudlian Ty
根據德國媒體 《踢球者》，哈化柏林喺來季會繼續借用利物浦中場球員古積（Marco Grujic）。
現年 23 歲嘅古積，上季外借哈化柏林期間，表現唔錯，踢咗 22 場德甲聯賽，射入 5 球。如果唔係期間足踝韌帶受傷，表現將會更為出色。除咗三間德甲球會，即係哈化柏林、雲達不來梅及法蘭克福之外，仲有意甲球會阿特蘭大都對古積有興趣。
與此同時，當時有觀察家認為，雲達不來梅係最有機會引入古積嘅球會，但係宜家嘅情況已經清晰，就係哈化柏林喺「古積爭奪戰」中勝出。古積嘅經理人及哈化柏林體育總監派列斯對此作出確認。
哈化柏林與利物浦已就繼續借用古積嘅事宜達成協議。之前曾被外借往卡迪夫城，及後於上季借往哈化柏林嘅古積，中期目標係希望能夠喺利物浦陣中佔一席位。
不過，古積來季繼續借往哈化柏林，相信會有利於佢嘅發展，甚至可以話係如佢所願。佢喺 3 月尾，接受《踢球者》訪問時表示：「如果利物浦喺夏天會再將我外借嘅話，我想留喺柏林。但係事情並唔係咁簡單，因為呢樣嘢唔係我可以決定。」
實際上，喺過去呢幾個星期，對古積表示有興趣嘅，係來自唔同方面，實在需時處理。但係現時嘅情況已經變得明朗，哈化柏林嘅耐性，終於得到回報。
