Mohamed Bouhafsi談費基亞轉會胎死腹中之因 | Liverpudlian Ty
Get French Football News 同法國著名記者 Mohamed Bouhafsi 嘅獨家專訪，上次講到柏比（Nicolas Pepe）嘅轉會情況，今次就談及令到唔少利物浦球迷刻骨銘心嘅費基亞（Nabil Fekir），同埋講到呢位里昂隊長喺上個夏天加盟利物浦嘅事情，點解最終會胎死腹中。
Mohamed Bouhafsi 表示：「首先，有樣嘢係會經常被人否定嘅，就係利物浦或將於今個夏天再次為費基亞作出報價。利物浦至少去到現時呢個時刻，未有就費基亞作出實質行動。實情係，現時未有歐洲大球會對佢感興趣，我認為呢個情況係相當特别。費基亞有一個不俗嘅球季，但係佢係可以做得更加好。想為佢講句好說話，喺贏得世界盃之後，有一個出色嘅球季並唔容易。宜家啲球會對足球已經有唔同嘅睇法，特別係費基亞所踢嘅位置。佢哋物色緊可以打反擊、好有力量、同埋高速嘅球員。你可以見到皇家馬德里有雲尼斯奧斯祖利亞、利物浦對柏比感興趣、拜仁慕尼黑對柏比、利萊辛尼及赫臣奧度爾有興趣。現時球會都喺度搵緊流動性高、具備快速同埋衝擊力嘅球員。費基亞唔屬於呢啲類別，同埋喺戰術部署嚟講，10 號位已經變得越來越罕見。」
「不過，費基亞係一位質素相當優厚嘅球員。我認為佢去西班牙或者意大利球會嘅機會，會比去英格蘭球會嘅機會高。即使宜家仲有幾個星期，大門仍有可能打開，但係外界對佢嘅興趣，已經比幾年前少咗喇。」
點解費基亞喺上個夏天未能成功加盟利物浦呢？
Mohamed Bouhafsi 話：「實際上我都唔知點解。關於呢件事，有好多唔同嘅說法，有啲人話係因為佢嘅膝部問題，甚或係其他原因。我知道費基亞有同利物浦進行體測，並且準備晒所有嘅影片等等。我認為有可能係到最後關頭，利物浦當時想同里昂及費基亞就條款事宜再次談判。但係，我認為亦都有可能嘅係，或者唔係所有利物浦嘅團隊成員都支持引入費基亞。」
「利物浦係一間非常有組織嘅球會，佢哋有轉會團隊、技術團隊、體育總監，同埋球會本身亦會有好多嘅討論同會議。簽下一個球員嘅過程，係喺領隊高普作最後決定之前，需要每一位轉會小組成員嘅工作。喺費基亞事件上，或者情況並非如此，尤其是喺達成協議嘅價格上，當時係遠超 €50M。」
