既然利物浦話係「純粹嘅謊言」，咁我就嘗試表達吓宜家嘅「純粹個人嘅諗法」……
今個夏天轉會窗嘅消息，有啲比較特別嘅情況。自從高普時代之後，關於利物浦嘅轉會消息，越來越有一種好靜、兼且相當封閉嘅情況，唔排除係因為之前所發生嘅事件有關，例如斟介雲迪克要搞到利物浦出官方聲明嘅事件等等，以致有關斟介球員消息嘅反應，甚或控制，比以前反應更快，甚至更小心。
另外，就係唔止一次出現大家視為好可信嘅消息來源，雖然係講緊同一件事，但係所報道出嚟嘅內容，係有天淵之別，甚或出現明顯嘅矛盾。近年來偶爾都有類似嘅情況，例如唔少利物浦球迷仍然感到刻骨銘心嘅「費基亞事件」（英媒 vs 法媒）、拉比奧特 （Julien Laurens vs Liverpool Echo）。不過今個轉會窗，呢個情況似乎更多，剩係以現時為止，已經至少出現咗起碼兩三次，例如修咸頓門將阿歷斯麥卡菲 （前利物浦官網記者 David Lynch vs Liverpool Echo)，仲有柏比 (Mohamed Bouhafsi vs 英媒）。
Mohamed Bouhafsi
柏比事件嚟講，Mohamed Bouhafsi 係法國著名記者，之前率先披露費基亞及法賓奴加盟利物浦嘅消息，往績亦屬於「例不虛發」。同時，英媒方面，同樣可信性相當高嘅 Melissa Reddy 及 Liverpool Echo，喺 Bouhafsi 嘅獨家專訪出咗街唔夠一個小時，就已經先後發出否認嘅報道，相當迅速，並且表示利物浦「憤怒」，話有實質斟介係「純粹嘅謊言」，用詞頗重。呢個情況，可謂近年罕見。除非真係冇咁嘅事，否則難免予人有「此地無銀三百両」之感，甚至影響與其他球會嘅關係，同埋利物浦本身嘅球會形象。
Melissa Reddy
點解會有上述嘅情況呢？尤其是柏比呢單嘢，點解會咁特別呢？相信至少包括咗呢啲可能性。
可能性 1：利物浦真係好想買，但係唔想俾人抬價。
可能性 2：宜家斟介仲未去到比較深入嘅階段，所以唔想「東窗事發」，以免壞咗好事。否則，萬一出現咗狀況嘅話，到時會有壓力，甚至要面對球迷嘅意見，同埋要管理球迷嘅期望。
可能性 3：利物浦的確有傾過，但係俾里爾用嚟作刺激同埋「吸引」其他球會報價之用，希望能夠發展成為 bidding war。利物浦因此而感到不快，寧願唔買。
可能性 4：利物浦根本冇傾過，純粹俾人攞嚟過橋。
近年利物浦嘅轉會消息，已經唔可以太過 straightforward 咁去睇，建議盡量嘗試搵唔同嘅媒體及消息來源求證。至於柏比事件，可謂相當有趣。Mohamed Bouhafsi 話利物浦有興趣，但係英媒就迅速徹底否認，最終事情發展會係點，就要拭目以待。我哋亦會繼續密切留意，有進一步消息會再同大家分享。
