Melissa Reddy：利物浦斟介尼高拉斯柏比是「純粹的謊言」｜Liverpudlian Ty
作者按：我知道 Echo 同 Melissa Reddy 喺以下呢篇訪問出咗冇耐，就已經好快出咗文否認，話利物浦表示對柏比有興趣嘅事係「純粹的謊言」。稍後我會再補充相關嘅內容。
法國足球記者 Mohamed Bouhafsi 之前講過，利物浦對法甲球會里爾翼鋒柏比有興趣，並且曾經與球會、球員及其經理人接觸過，其他有興趣嘅球會包括德甲球會拜仁慕尼黑同埋會有第三間球會嘅出現，現時有待球員作出決定。佢接受媒體 Get French Football News 嘅獨家訪問，當中講到柏比嘅情況。
Mohamed Bouhafsi 表示：「呢個係一個 €80M 嘅情況，而呢個情況係需要時間同埋冷靜。我可以講嘅係，利物浦就柏比嘅事宜進行咗非常實質嘅討論，里爾方面對此冇否認過。里爾並唔否認來自利物浦方面嘅非常實質嘅興趣，並且同佢哋討論過。即使係拜仁慕尼黑，我已經好一段日子冇得到關於佢哋嘅資訊，但係其他球會有可能加入對柏比嘅爭奪。我知道我嘅其中一位同業，來自《隊報》嘅 Bilel Ghazi，佢做咗一個相當好嘅工作。我想恭喜佢，因為佢本身係一位好好嘅人，佢喺呢件事談及到馬德里體育會及國際米蘭。」
「我冇關於馬德里體育會嘅資訊。至於國際米蘭，我之前講過有一間不具名嘅第三間球會，喺我同利物浦球迷就柏比嘅事情作出交流之後，我認為第三間球會可能就係國際米蘭。但係我認為 €80M，對佢哋嚟講太貴。另外，我亦都知道利物浦領隊高普好欣賞柏比，佢擁有高速，好適合喺英格蘭聯賽踢波，並且有出眾嘅反擊能力。同利物浦已經進行咗討論，利物浦對柏比相當感興趣。另一樣嘢我知道嘅係，因為宜家柏比踢緊非洲國家盃，所以想要至少好幾日嚟作出決定。」
「利物浦會方冇否認到對柏比嘅興趣，我知道拜仁慕尼黑仍然密切留意及跟進情況，即使柏比唔係佢哋嘅頭號目標。拜仁自從喺冬天嘅時候開始，對柏比有興趣，至今興趣仍在。呢件事將會喺未來幾日，甚至幾個禮拜將會明朗化，或者只係喺非洲國家盃之後。呢個係需要時間，因為柏比想要時間，同埋我哋要尊重球員本身嘅意願，佢宜家想專注喺國家隊嘅賽事。如果嚟緊嘅日子有其他球會想加入爭奪嘅話，唔好感到奇怪。喺里爾方面，我被告知佢哋預期會有其他英超球會加入爭奪，呢個並非不可想像嘅情況。」
至於 Melissa Reddy 嘅否認報道如下：
利物浦告知 ESPN FC，有關佢哋就關於柏比轉會嘅事宜，與法甲球會里爾進行實質討論嘅講法，係「純粹嘅謊言」。
利物浦強調，同法國傳媒嘅報道唔同，佢哋冇就柏比嘅事宜，進行會面或者討論。
喺 6 月份嘅較早時間，利物浦體育總監米高愛華士自己聯絡里爾領隊哥迪亞，告知利物浦對柏比「零興趣」。
利物浦覺得，佢哋被用作刺激外間對柏比嘅爭奪，呢位科特迪瓦國腳嘅價格係大約 £70M。
柏比係一位能夠勝任多個位置嘅攻擊球員，被傳與拜仁慕尼黑、馬德里體育會及國際米蘭扯上關係。無法將柏比留住嘅里爾，想藉此將柏比出售，得到最大嘅收益。
柏比預料會喺非洲國家盃之後，會就佢嘅去向作出決定。
