【轉會SportsLight】荷蘭U19後衛將成利物浦今夏首簽｜Liverpudlian Ty
根據前 Liverpool Echo 記者，現時於 goal 任職嘅 Neil Jones，利物浦勢將成功羅致荷蘭 U19 後衛雲丹貝治（Van den Berg）。
現時效力荷甲球會施禾利嘅雲丹貝治，其合約已經踏入最後一年，德甲球會拜仁慕尼黑及同樣來自荷甲嘅阿積士都想得到佢嘅加盟。
利物浦希望完成簽入雲丹貝治，但係將會面對唔少歐洲列強嘅競爭。紅軍渴望於今夏將佢帶到晏菲路，但係拜仁慕尼黑、阿積士及 PSV 燕豪芬都渴望得到呢位荷蘭 U19 中堅。同時，據了解，意甲球會森多利亞喺 1 月報價 £2.25M。
雲丹貝治喺 2017-18 年度球季，開始成為施禾利一隊嘅球員，踢咗 7 場荷甲聯賽。喺上一個球季，佢喺前曼聯球員史譚嘅麾下，上陣 16 次荷甲聯賽，協助球隊以第 13 名完成球季。
如果雲丹貝治加盟利物浦，佢最初會先加入利物浦嘅青訓學院，參加 U18 及 U23 嘅賽事，並且視乎佢嘅表現，考慮會否有進一步嘅提升。
利物浦喺上個夏天，從阿積士羅致賀化（Ki-Jana Hoever），係一個成功嘅經驗。賀化喺利物浦青年軍表現出色，迅速冒起，並於 1 月份，利物浦對狼隊嘅足總盃賽事，正式首次為利物浦一隊上陣。利物浦希望，身高 6 呎 3 吋嘅雲丹貝治會好似賀化咁嘅發展。
利物浦雖然未確認雲丹貝治嘅加盟，但係考慮到羅致佢期間所遇到嘅競爭，球會嘅轉會團隊將佢視為一個相當好嘅引援。利物浦嘅 Head of Recruitment Dave Fallows 同埋首席球探 Barry Hunter 特別渴望能夠成事，並且相信喺過去幾日係有實質進展。
利物浦喺 2015 年，從查爾頓羅致祖高美斯，Barry Hunter 發揮重要角色。其後，利物浦得到一位年輕、有潛質嘅後衛，並且令佢成長，長遠地能夠成為球會一隊嘅球員。祖高美斯喺利物浦幾乎係即時發揮佢嘅作用，雖然及後受到傷患影響。
利物浦嘅轉會團隊深信，雲丹貝治嘅能力，就好似四年前嘅祖高美斯，並且預期佢會好似賀化咁，唔使太耐嘅時間，就可以升上一隊。佢同賀化一樣，都能夠操流利英語，並且喺球探報告同埋來自荷蘭嘅個人性格諮詢考核方面，評價都係非常之正面。
喺 12 月先至 18 歲嘅雲丹貝治，現時已經踢緊荷蘭 U19 國家隊，喺歐洲足協 U19 外圍賽上陣 3 次，射入 1 球。雲丹貝治嘅弟弟 Rav，之前亦都同利物浦扯上關係，但係據了解，現時利物浦只係想羅致雲丹貝治。
利物浦喺今個月嘅較早前，放走咗一批 U18 及 U23 球員，包括後衛哥利韋倫、拉達倫、馬斯達臣、桑馬及蘭度爾（Corey Whelan, Patrik Raitanen, Conor Masterson, Juanma and Connor Randall）。
