評點《FourFourTwo》排名：低估簡尼小豬，冇奧斯？利雲度夫斯基過譽｜李聲揚
又係跟進隔離台陳生嘅時間。科科吐球壇最勁101人，94年計起。
科科吐只係講最強101，好似冇話跟排名。但大家心照都知係跟排名。你試下放拿鐵斯第一美斯最尾丫。
首先，呢啲選舉永遠都可以拗。點解邊個高過邊個，點解邊個有邊個冇，其實就永無定案。即係，陳生同我都會同意，頭兩位嗰兩個真係唔使拗。C朗完勝晒其他人，但美斯更勁一級。如果好似啲留言咁堅持話冇拎世盃等於唔係球王，就真係冇得討論落去。
好，正如陳生講。呢啲選舉除咗有排拗，就當然仲有一種systematic error：一定係偏重近代球員，同埋點都會偏袒攻擊球員，冇計。而肯定有shining moment嘅，大賽關鍵時侯入波嘅，總會係秤高啲。而我亦有理由相信，呢個榜偏袒咗英格蘭球員（not necessarily 英超）。
於是陳生發明咗個，相對地（講L清楚，永遠都係相對）客觀些少嘅方法。你見其實鬼佬做量化分析都係大約用呢啲方法。陳生的methodology，咪計分數，加權平均。
原文在此，佢仲計咗頭九個（其他留畀我做功課）：
金球獎冠亞季 30/20/10 分，世界盃冠亞 20/10，歐聯、歐國美洲盃冠亞 10/5 分，聯賽 5 分…咁計成就，就會（大概係咁，粗略計架，只計 94 年後）
再講一次（真係好L多文盲）。呢個只係相對地客觀。你要拗拗到天光都得。「金球獎咪又係偏袒攻擊球員」「點解世界盃季軍都有分但歐國季軍冇」（因為冇季軍戰，但其實一樣可以加個分）。任你。背後涉及太多好主觀嘅嘢。例如一個冠軍十次出局（英格蘭？）係咪威過幾屆第三（烏拉圭荷蘭？）之類。
又講一次，舊文寫過「記住啦，9up最簡單，最L好廿蚊有靜岡蜜瓜你食。但我地落手落腳寫文或做研究嘅，永遠係簡單／準確／快手之間拎個平衡。」
而我自己覺得陳氏評分比較公道嘅（即係，我認為）改善，有以下：
1. 我傾向唔計金球獎。因為偏袒咗攻擊球員。同埋，大家都知金球獎雙數年點都睇大賽（世盃，歐國），單數年就睇歐聯。其實係double count咗
2. 我亦傾向歐國盃應該計多少少。歐洲國家已經連贏四次世界盃，亞軍都拎咗三次（唯一一次例外係阿根廷，仲話美斯冇用？）。對上一次南美隊拎世界盃時（2002），我估唔少讀者都未L睇波。明顯地歐洲國家嘅水平遠高於南美。你話，咁歐洲國家多嘛，好似係，但嚟嚟去去南美咪巴西阿根廷。2002年之前，決賽有一隊南美先係常態。理論上歐洲最強係世界最強嘅subset，實際上已經差不多一樣。加上歐洲國家盃冇咁多魚腩，其實含金量應該有世界盃八九成甚至更多。
3. 聯賽真係有強弱分，陳生做嗰堆全部都係頂級聯賽。但陣間到我做呢，啲友荷超甚至克甲（定克超？）就係咪都計咁多分？解決方法：又唔使排晒強弱咁煩，但記得以前歐洲金靴（仲有冇呢樣嘢？）都會分返兩三層，四五六大聯賽入波就計多啲，以免查度（Jardel）之類的屈機獸在波圖係咁入波年年拎（話說回頭，呢條友在波圖125場入130球，神經的）。
大約就係咁。當然要挑骨頭嘅，玩到下年都得。你可以世界盃1–32位全部比個分，歐聯一樣，四強又有分八強又有。金球獎又係。甚至去到聯賽，亞軍你又可以比分。而聯賽強弱可以全部計UEFA coefficient。呢啲咁偉大嘅嘢等你地去做。
所以，我都係沿用返陳生嘅系統。而我計嘅，當然係德國同德甲球員，因為我睇得多，比較易講。講得簡單啲就係拜仁and friends。因為德國而唔踢拜仁嘅，聯賽個分已經死咗大半。除非踢非英超外國大會，卻奧斯基迪拉甚至達史迪根之類。所以我個榜都係數啲德國球員，同埋拜仁球員。
計出嚟，咁嘅情況。當然會有錯，特別係數啲大賽第二三會漏，歐聯亞軍又係易漏。同埋有啲波蘭聯賽 克羅地亞聯賽都數埋落去。但大約應該係咁上下。
最想睇嘅，就係只計呢班德國／德甲之友，科科吐排名，同陳氏排名，有咩分野？點解？你又同唔同意？
幫你分晒色，四類人，分開講下。
一、先講紅色嘅，陳氏排名高，科科吐排名低，甚至冇嘅人。當中頭兩個，應該分開講。
寧舍超班嘅，陳氏排名第一。西德／德國鐵人馬圖斯，真係未睇過都聽過。世界盃一冠兩亞，聯賽八次冠軍（七次拜仁一次國米），但最煞食係金球獎，一次冠，一次亞（雙亞，我計亞軍分）。點解科科吐冇？因為科科吐1994年先出。馬圖斯呢啲係史前球星。如果唔係呢個原因，必定上榜同埋會排得好頭。留意奇連士文就有上榜。
Cruyff: Kroos should have won the Ballon d’or – Football Oranje
Dutch Football legend Johan Cruyff has said that German midfielder Toni Kroos should have won the Ballon d’or.
陳氏排名第六嘅，唔係史前人，但科科吐名都冇。卻奧斯。呢個真係極被低估。固然近一兩年係佢極低潮，國家隊球會雙雙唔掂（但，2018年唔係佢，德國都唔使對南韓已經出局）。但真係呢，德國捧世界盃佢係表現最好幾個之一，加上長期在拜仁／皇馬都正選，歐聯捧到手軟。告魯夫死前冇耐認為佢係世界最佳，可能誇張，但排名一百都冇？痴線。可惜呢啲排名一定不利佢呢啲球員。冇乜入波，冇killer pass，又唔係中場係咁掃人。就似係個好可靠嘅鐘咁，永不出錯永不傳失波（總有例外，2014決賽希古恩生性啲，佢就係世紀罪人，希古恩就唔使做世紀D靶，美斯阿媽亦都清靜好多。人生……）
打後一大堆陳氏有科科吐冇嘅，全部都係啲拜仁球員。冇計，拜仁聯賽七連冠，呢度都打底35分。歐聯捧過兩次，仲要有三次亞軍。如果加埋生啱國家，高分唔難。查維馬天尼斯之類好多人都未必識，但真係生得啱時間，大把盃捧，雖則其實國家隊一直唔係主力。另外呢堆都係防守球員多，其他嘅，高美斯都話捧過歐聯。艾簡達拉史高爾都命水唔好，前者去咗拜仁後拜仁就過咗高峰，國家隊一樣，佢入選後已經冇咁勁。後者成日傷，加上撞正國家隊黑暗期。你可以話陳氏評分系統偏袒咗啲大球會嘅忠心綠葉，例如艾拿巴（我都唔記得放上去）。但又掉轉諗，可以在間大會企穩咁多年嘅，點都有啲實力掛？掉轉，你計世界盃歐聯，可能真係都唔使落場就拎咗，要落場嘅都只係幾場波發揮到就得。
二、黃色呢兩個，真係stand out。簡尼小豬，在陳氏評分更勝拿姆洛賓。但科科吐排名遠遠不及（雖則都上到榜）。講真，四個球員我都睇得好多，四個都好鍾意。簡尼在科科吐排到85，有病嗎？照計真係三劍俠後德國球員中最勁了。我真係睇唔到有乜可以挑剔，聯賽歐聯領袖風範大獎乜都有，仲有啲人最鍾意J嘅咩血性鬥心。就係可能爭個世界盃冠軍，同埋守龍，同埋年代較遠。小豬爭議大啲，但2012–14嗰幾季真係堅。特別係世界盃決賽，畀人踢到仆街（阿根廷球員嘅作風都好出名）。唔少人心中嘅MVP。可惜都係人記得近代球員多啲
貼多次——
三、白色一堆，陳氏排名高，科科吐排名都算高嘅。留意，全部拜仁幫，而除咗拿姆外全部都現役（洛賓列貝利下季走）。由於呢班近代啲，所以科科吐排得高。拿姆話晒世界盃兼歐聯冠軍隊長，所以突破到不利防守球員嘅問題。洛賓呢，在科科吐排到咁後，又係有冇搞錯。其實在拜仁top fit 時，真係美斯C朗之後應該到佢。拜仁近N年最佳收購就係佢，四年三次歐聯決賽。另外三個，真係要比，就爭拿姆洛賓少少了。紐亞雖勁，但睇咗咁多年，好似都係簡尼仲勁啲，特別係簡尼年代啲隊友是十分甩皮甩骨的。列貝利講在拜仁入波唔少過洛賓，但就係爭啲嗰種天才橫溢嘅味道，而且國家隊冇乜成就。梅拿嘛，早熟早殘。2010-2014好堅，但之後就冇乜料到了。
四、綠色呢一堆，科科吐有排名，而陳氏榜低嘅。你見到，幾個都係古人。奇連士文聯賽贏得一次，歐聯更加捧蛋。睇真啲好似真係冇你想像中咁勁咁屈機。森馬好啲，有歐聯有聯賽，仲要唔係踢拜仁，好難得。波歷克就不用講啦，真係生不逢時，舊隊友太廢，到新隊友冒起時佢就傷，傷埋就同方丈路維反面。同埋千年老二嘛。好彩在車路士捧返啲盃。
高路斯就好具爭議，球會其實冇乜作為。但國家隊嘅分極高（就僅次於馬圖斯）。主要因為佢02玩到14，見證德國由低谷小反彈再低谷再反彈。仲要世界盃冠軍季都有，仲要係世界盃射手。但另一方面，講真，睇佢啲波，真係同頂吸球員比，你都知道技術認真麻麻，就係勤力同捕位好。都真係要隊友勁先得。
利雲度夫斯基，得罪講句，科科吐overrated了。在陳氏評分，佢在呢班人最尾，但科科吐佢排到50。當然係因為佢係大會拜仁嘅當家射手。但冇法，國家隊一無是處。固然波蘭係弱旅。但你睇佢在國家隊踢波，都真係好唔掂，唔會見到有乜一命救全家。我知，佢國家隊都入56個波，好痴線，但真係弱隊殺手啫。即使講球會，感覺都係重要賽事就冇乜作為。我知，對皇馬大四喜嘛，但多蒙特年代了。拜仁年代，真係感覺十分奧燒。
最後，不妨拎佢地啲分同陳生做嘅頂級球員比。馬圖斯唔好計。但你見簡尼，小豬，拿姆，洛賓，卻奧斯，紐亞，梅拿，列貝利八個，其實都85分以上。同美斯C朗當然冇得比，同施丹恩尼斯達沙維比都爭啲，但真係科科吐頭十嘅馬甸尼朗拿甸奴，都係咁上下分數咋。又當然，你計落去，我估意大利06前後，西班牙101214 啲大會球員都好高分的。
仲有幾個point可以講。
拜仁嘅獨大，就幫咗一班忠心員工，個個三四十分底分。同樣地，而家踢祖雲達斯嗰堆亦都係咁。而亦見到年代較遠啲球員，冇咁易一條友拎咁高聯賽分，亦都冇咁易轉會。洛賓伊巴謙莫域嗰啲去到邊都係拎冠軍，識揀老細。你睇奇連士文先一次聯賽冠軍，施丹朗拿度甸奴亦各自只係三次。朗拿度仲要只係得兩次。
仲有，以前嘅歐聯，同而家，又好似唔係完全可比。感覺（純感覺）以前啲會冇咁重視。
最後，又係老問題。可能係bias，但你見拜仁德國，都真係打整體多過一兩個球星。拜仁德國在2008–2014呢八年，真係算皇朝了。盃唔係捧得多，拜仁就一次歐聯，德國就一次世界盃。但你睇入四強決賽之類，算係相當強。但一樣極少會有人拎到金球獎頭三的。因為美斯C朗基本上佔咗兩個位，冇計。
又，可以搵人計下英格蘭球員。Given that 國家隊都係空白一片，聯賽又真係成日換冠軍，照計啲友嘅分唔會太高？但科科吐個榜，都幾多英人。
Bild list The 100 best German Bundesliga players of all time | 101 Great Goals
German newspaper Bild have undertaken a huge task going into the final day of 2015 – they have listed the 100 best German Bundesliga players of all time. As Germany’s leading newspaper and a fine source for news coming out the Bundesliga, Bild are well placed to compile such a list.
真係最後。你話睇啲網友講就嘥氣，我都係信權威。圖片報曾經投過最佳100個德甲嘅德國球員，可以參考下。但，個問題就當然係有啲冇乜點踢過德甲嘅（比亞荷夫？）就冇計。另外，卻奧斯波歷克呢啲踢海外多嘅，又唔知佢係計整體成就定只計踢德甲嗰時。無論如何，多個參考
你估唔到，第一居然唔係碧根鮑華，係轟炸機梅拿。但呢兩位係頭二應冇乜爭議。唔計古人施拉呢，排名最高嘅，正係半古人馬圖斯。陳氏評分話頭，如果計埋馬圖斯，照計點都係第一。打後，唔計古人，就係簡尼。同陳氏評分一樣。所以都真係唔好話冇用。
不過在圖片報排名，打後嘅就係梅拿高路斯紐亞。梅拿紐亞正路，但高路斯在德甲其實……勁嗰時就打細會，去到拜仁就冇乜作為（亦因為領隊唔重用）。當然國家隊堅揪無誤。
最想講嘅都係，奇連士文排到好後下。三十不入。大膽講，目測同我咁上下大嘅，四十歲上下四五年嗰啲，基本上人人都當奇連士文係神。冇計，當年講德國三劍俠，咁奇連士文係前鋒，又靚仔，又英超，之後仲要帶德國，點都係佢。但至少在圖片報心目中，冇你想像咁神化。甚至在小豬保定福士希士拿之後。當然，佢嘅排名應該只計在德甲年代。
Facebook 專頁有更多短文: www.facebook.com/ivanliresearch
