根據 Melissa Reddy，即使係意味著喺下個夏天可以自由轉會，利物浦都唔會喺呢個轉會窗將奧歷治（Divock Origi）出售。
呢位比利時國腳前鋒，同利物浦嘅合約只係剩番 1 年，但係佢嘅經理人已經就新合約事宜，與利物浦進行談判。
現年 24 歲嘅奧歷治，喺上季射入幾個關鍵入球，協助利物浦繼續英超冠軍嘅爭奪，同埋奪得歐聯冠軍。
至於日後嘅長遠發展，佢現時未作出決定，不過各方面嘅有關人士滿意於現狀，因為奧歷治樂於下季繼續留隊，同埋去到 1 月呢段時間，利物浦仍然可以遊說佢續約。
如果奧歷治選擇唔續約嘅話，並唔係因為金錢上考慮，想喺球隊留到約滿。佢從來冇俾壓力球會，要求有更好嘅薪酬待遇。佢會睇出場時間同埋所得到嘅經驗，比金錢更重要。
奧歷治與 FSG 主席米高哥頓同埋體育總監米高愛華士有緊密嘅關係。後者已經唔止一次反對將呢位比利時前鋒以平價出售，並且相信佢會有重要嘅貢獻。
利物浦喺 2014 年，以 £10M 轉會費，從法甲球會里爾羅致奧歷治。不過，佢哋將奧歷治借往德甲球會禾夫斯堡嘅時候，從借用費已經收到相當於 £10M 轉會費之中，超過一半嘅金額。
利物浦預期，今夏會係一個寧靜嘅轉會窗，以優厚合約留住核心球員嘅方向為主，羅致球員則視乎球員離隊及球隊陣容深度嘅情況。
利物浦嘅諗法係，喺轉會窗期間保持耐性及適時作出反應，如果有合適嘅球員可以羅致，佢哋就會採取行動。
利物浦領隊高普喺 3 月曾經表示：「我唔認為呢支球隊喺宜家呢個時候需要大灑金錢。最好嘅方法就係一班球員喺埋一齊，嘗試令佢哋發展同成長，同埋留喺隊中一段時間。」
「呢個就係過往十年，利物浦所遇到嘅主要問題。當佢哋擁有一支好球隊，一季之後，佢哋就會各散東西，今年肯定唔會有呢個情況。」
