賴恩肯特獲標價1200萬鎊，拒絕外借列斯聯｜Liverpudlian Ty
根據前 Liverpool Echo 記者，現時與 goal 任職嘅 Neil Jones，年青翼鋒賴恩肯特將拒絕外借往英冠球會列斯聯，同時利物浦會索價 £12M。
現年 22 歲嘅賴恩肯特，上季外借往蘇超球會格拉斯哥流浪嘅表現不俗，更成為蘇格蘭職業足球員協會嘅最佳年青球員，佢唔想喺今夏再次被外借。
利物浦今夏會索價 £12M，賴恩肯特將拒絕外借往列斯聯。佢喺上季外借格拉斯哥流浪期間，上陣 43 次，射入 6 球。
列斯聯已經正式作出借用要求，但係據了解，賴恩肯特比較想喺利物浦爭取一隊席位，或者以永久轉會形式，加盟另一間球會。
如果係後者嘅話，利物浦相信，以賴恩肯特嘅經驗， £12M 會係合理嘅標價。
利物浦亦都留意到，喺今個月較早前，威爾斯翼鋒丹尼爾占士由史雲斯轉投曼聯，轉會費可達 £18M。現年 21 歲嘅丹尼爾占士，轉會前同史雲斯嘅合約只係剩番 1 年，喺一隊嘅經驗亦只有 43 場。
至於賴恩肯特，佢同利物浦嘅合約去到 2022 年，並且之前曾經踢過高雲地利、班士利、弗賴堡、布里斯托城及格拉斯哥流浪，累積咗 125 場嘅一隊出賽經驗。
另外，如果佢想留喺利物浦，沙拿、文尼及費明奴喺季前熱身賽嘅缺陣期間，意味著佢應該有機會喺領隊高普面前爭取表現。
格拉斯哥流浪想賴恩肯特繼續留低，但係睇嚟未必能夠達到利物浦想要嘅價格。同時，英超升班馬阿士東維拉等球會有意羅致賴恩肯特。
英冠嘅米杜士堡係另一個有可能嘅落腳點，佢哋將會由曾經效力過列斯聯嘅活基治執教。活基治曾經同利物浦嘅轉會團隊有相當好嘅關係，包括體育總監米高愛華士。米杜士堡曾於 2017 年接近簽下賴恩肯特，但係最終不敵德甲球會弗賴堡。
據悉列斯聯係純粹借用嘅要求，但係如果佢哋將具天份嘅 18 歲年青球員積克奇勒出售嘅話，可能會想以永久轉會形式洽購賴恩肯特。英超球會水晶宮及熱刺，都與積克奇勒扯上關係。列斯聯領隊比爾沙繼續留隊爭取升班，預料今夏轉會窗會有唔少嘅舉動。
此外，格拉斯哥流浪最有機會借用利物浦年青翼鋒奧祖一季。
奧祖上季借往法甲球會蘭斯，發展並唔係太順利，只有 3 次正選上陣，並且渴望透過一個好嘅外借表現，令事業重返正軌，就好似賴恩肯特喺格拉斯哥流浪，同埋哈利威爾遜喺侯城及打吡郡咁樣。
兩間球會已經就借用奧祖嘅事宜展開談判，但係奧祖現時放緊假，會有時間考慮佢嘅選項，預料下星期會有進展。
