Neil Jones：古積不愁下家，獲三隊青睞 | Liverpudlian Ty
根據前 Liverpool Echo 記者，現時於 goal 任職嘅 Neil Jones，就塞爾維亞中場球員古積（Marko Grujic）嘅事宜，利物浦接獲來自德國、西班牙及英超球會嘅接洽。當中德甲球會哈化柏林、雲達不來梅及法蘭克福，都渴望得到呢位上季喺哈化表現不俗嘅 23 歲球員。
古積上季外借哈化柏林期間，表現唔錯。據了解，呢間首都球會渴望再次借用佢。
古積會對繼續留喺柏林表示歡迎，但係哈化將會面對來自法蘭克福及雲達不來梅嘅競爭。
法蘭克福會歡迎以永久轉會方式羅致古積，佢哋最近將射手祖域售予皇家馬德里，現時手上擁有一定嘅資金。
利物浦相信，佢哋能夠喺古積身上得到至少 £25M。古積上季為哈化柏林上陣 23 次。
有一間不具名嘅英超球會亦有就羅致古積嘅事宜作出查詢。另外，馬德里體育會亦可能會出手洽購古積，因為預計該西甲球會嘅中場球員洛迪，會轉投拜仁慕尼黑或曼城。
利物浦將會容許外借活特本（Ben Woodburn），英冠嘅韋根係其中一間有興趣嘅球會。另一間英冠球會侯城，曾經係最有機會得到呢位威爾斯國腳，但係佢哋嘅領隊艾堅斯離隊，導致情況有變。
此外，兩名年青球員靴比簡尼（Herbie Kane）及艾查利亞（Ovie Ejaria）預期會同活特本一樣，下季前往英冠球會。英冠球會賓福特及米禾爾就上季喺英甲唐卡士打表現不俗嘅靴比簡尼作出過查詢，蘇超球會喜伯年亦喺競爭嘅行列。
至於艾查利亞，可能會再次返回雷丁，佢喺上季嘅下半季，借往該英冠球會。此外，另一間英冠球會布力般流浪都對佢有興趣。
利物浦將會俾兩名年青球員 – 尼日利亞前鋒阿禾尼爾及哥倫比亞後衛安達臣阿羅約，於季前與一隊喺 Melwood 操練。
尼日利亞前鋒阿禾尼爾（Taiwo Awoniyi），喺上季初時係借往比甲球會真特，但係發展並唔順利。及後喺下半季，借往比甲球會梅斯干，射入 10 球。現時有唔少球會對佢有興趣，特別係德甲球會史浩克 04。
至於哥倫比亞閘位球員安達臣阿羅約（Anderson Arroyo），上季借往比甲球會真特，但係未能得到上陣機會。呢位現年 19 歲嘅球員，最近喺波蘭參與世青盃，協助哥倫比亞 U20 晉身八強，及後不敵烏克蘭出局。
最後，年青門將加巴拉（Kamil Grabara）現時喺意大利，代表波蘭踢 U21 歐洲國家盃。當佢完成賽事之後，將會被外借。現年 20 歲嘅加巴拉，上季借往丹麥球會阿曉斯（Aarhus），有來自比利時及德國等球會對佢有興趣。
