Mohamed Bouhafsi：利物浦洽購尼高拉斯柏比，拜仁及另一不具名球會加入爭奪｜Liverpudlian Ty
最近來自法國嘅足球記者 Mohamed Bouhafsi 講到有關效力法甲球會里爾嘅科特迪瓦攻擊球員尼高拉斯柏比 (Nicholas Pepe) 嘅消息，當中表示利物浦正處於一個理想嘅位置，另一間有興趣嘅球會係拜仁慕尼黑，但係現時事情未去到深入嘅階段。另外，第三間非常重要嘅球會，或會及後出現。
其後 Liverpool Echo 隨即對該轉會消息作出否認，並且表示利物浦並冇同里爾及柏比嘅經理人，就轉會嘅事宜作出接觸，並且表示利物浦並冇競逐羅致呢位科特迪瓦攻擊球員。
不過，喺另一邊廂，被問到柏比嘅情況時，Mohamed Bouhafsi 再度作出回應。佢表示，里爾有同利物浦就柏比嘅事宜作出討論，里爾本身有承認呢一點。另外，球員本身亦都有同利物浦洽談過。Mohamed Bouhafsi 亦表示，利物浦並唔係同柏比「完全切割」，現時正等待球員方面嘅決定。
另外，被問到柏比最終會加盟邊間球會，Mohamed Bouhafsi 回應，佢暫時未知道，唔想俾利物浦球迷一個假嘅希望，佢話希望喺下星期能夠知悉事情嘅進一步消息。Mohamed Bouhafsi 亦認為，球會以呢種方式嚟處理轉會消息，係唔想萬一柏比選擇其他球會時，會令球迷失望。
現年 24 歲嘅柏比，本身司職翼鋒，亦能勝任正前鋒位置。呢位科特迪瓦國腳，今季係里爾嘅表現出色，射入 22 球，協助球隊成為聯賽亞軍，可謂法甲聯賽最佳嘅攻擊球員之一。當今歐洲冠軍利物浦，現時正在物色一位能夠勝任多個位置嘅攻擊球員。
近年利物浦嘅轉會消息，「隱蔽」程度愈來愈高，同時出現「突如其來」嘅轉會新聞。就好似喺上個夏天加盟嘅法賓奴，當日「突然」有消息，佢將會由法甲球會摩納哥轉會利物浦。及後不足三四個小時，利物浦就宣佈佢嘅來投，可謂「迅雷不及掩耳」。而率先披露呢個轉會消息嘅記者，正正就係 Mohamed Bouhafsi。甚至費基亞勢將加盟利物浦嘅消息，亦係由佢迅速作出披露。今次嘅柏比事件，睇嚟相當有趣。若有進一步消息，會盡快再向大家報道。
