西甲人工性價比：唔係巴塞勁，係皇馬廢｜李聲揚
一雞四味，先寫英超，好合理，最多人關注，數據最易搵，亦都最早煞科。第二德甲，第三西甲（呢篇），第四意甲。除咗係煞科次序，亦同啲數據透明度有關。
英超人工性價比：曼聯水魚無誤，利鏝使得精明，阿車對得住球迷｜李聲揚
記得之前寫過篇德國波文，畀人狂插，狂恥笑上維基睇波。開頭有啲扯火，但諗諗下都係，年紀大記性差體力衰退，講睇波點都多唔過啲新一代（而嗰篇文又真係比較差）。既然係咁，索性個踢法再經濟啲，幾廿歲同你鬥撞咩，直頭唔同你講場波。我就做星期一早上四分衞（Monday morning quarterback），完晒球季先寫文。波都唔使睇。呢排先最多文出。 【蔗渣價錢，踢出…】 …
講返，睇人工（引申到實力），英超，基本上係兩個組別，迫悉匙同埋其他。德甲，就三個組別，拜仁，多蒙特，同埋其他。
德甲人工性價比：拜仁大水魚（吹咩？），多蒙特都只係OK，最叻係……？| 李聲揚
上篇 英超人工性價比 ，都算係受歡迎。最重要係個圖。人工買到成功就固然，美斯唔使出糧咩。但上次個圖都大約見到，有一個OK強的線性關係。同埋解咗比你知，唔係 「正比例」，所以計咩平均一分使幾錢，係錯嘅。再講一次， 「正比例」係線性關係嘅特例。所有「正比例」都係線性關係，但唔係所有線性關係都係「正比例」，明冇？ …
西甲呢？介乎兩組同三組之間。我覺得係三組，但你認為係兩組嘅勿小，我都只係目測，你鍾意嘅拎數字嚟說服我，OK 的。
幾肯定嘅係，巴塞皇馬係同一組，至少人工上係（每屆表現另計）。馬體會另一班波（再講一次，人工上），而又似乎甩開其他17間。所以我理解係三組：巴塞皇馬，馬體會，其他。你鍾意巴塞皇馬，馬體會撈埋落其他，都OK。
上季的！
做西甲嘅一個問題係，搵唔到人工！用返英超德甲嘅source site，西甲人工仲係上一季，而其他網站亦似乎搵唔到。退而求其次，搵到嘅係spending limit，cross check過應該係準的。
我對返上一季嘅spending limit，同埋人工……結論係唔係好對得到，仲要前者係成間會，後者係平均每人，中途出出入入又唔知點計。放棄。我相信用spending limit都夠，你唔用盡有自己考慮就你嘅事（亦唔知用突咗有乜後果）。
背景講完，以下係聯賽榜同埋數字。另外一般我都用返3 letter code，但西甲四隊V字頭，華倫西亞（VAL ）易認，其他三隊維拉利爾（Villarreal），華拉度列（ Valladolid）同埋華歷簡奴（ Rayo Vallecano）用返全名，費事亂。
出嚟嘅圖，係以下咁。照舊，紅圈叻仔洗得精明，藍圈水魚，綠圈恰如其份。
又係看圖作文時間：
— 明顯睇到巴塞皇馬係另一班波。馬體會都好似係帶離其他17隊（但又明顯低過巴塞皇馬）。你見個圖散開晒
— 巴塞皇馬supposedly係咁高咁大的，人工預算好接近。四大聯賽冇頭兩隊咁近，拜仁人工固然高過多蒙特好多，而曼城都高過利物浦兩成（當然最高人工係曼聯）。
— 所以踢出嚟皇馬真係離晒譜，啲球員辦事不力，大藍圈。
— 唔係巴塞勁，係皇馬廢。皇馬廢先顯得巴塞勁，但冇巴塞比較皇馬都係咁廢。呢度係指洗錢上，唔係球技。實務上操作好簡單，拎走左皇馬，巴塞就由斜線之上（紅圈）變到斜線之下（藍圈）。但，就算拎走巴塞都好，皇馬都仲係藍圈。另一講法係皇馬之廢，造就晒其他隊好似好勁（其實同拜仁有啲似，一樣性格比極低，但至少拜仁拎到國內雙冠）
— 同德甲一樣，冇錢萬萬不能。三隊降班嘅都係死有餘辜，係令人失望嘅大藍圈。英超唔同，卡迪夫真係咁嘅米煮咁嘅飯，光榮降班，綠圈。
— 西甲嘅貧富懸殊極嚴重。好多方法驗證到。大會一間頂十間就預左啦，每個聯賽都係。但，在英超，最高人工嘅曼聯，同最低人工嘅卡迪夫城相比，相差都未夠7倍。德甲呢？拜仁人工係紐倫堡20倍，就算你計多蒙特都10倍。西甲就仲誇張，皇馬巴塞都係榜尾幾隊嘅25倍咁滯。
— 另一個睇法：巴塞人工，1隊頂13隊最低嘅加埋，大半個榜。即使係拜仁都只係9隊，半個榜。英超更加任何5隊加埋都會多過最高嘅一隊曼聯。
— 基達菲的確係神奇嘅。雖然最後跌返個歐聯位出嚟，但佢地人工只係西維爾華倫西亞嘅四份一。
— 武磊嘅愛斯賓奴都不錯。更重要係佢地同分壓倒畢爾包，有歐霸打。
— 人工嘅解釋力都幾高。有啲意外，西甲呢個圖嘅R² 都0.68，人工解釋咗分數分野嘅68%。英超去到70% ，德甲講緊49%。
— 西甲啲細會雖則窮，但用錢唔算太亂嚟。指嘅當然係人工，轉會費另計。證據？大會有專家有外人幫，畀人工其實嚴重死錯人嘅機會唔係太高，偶然一兩個或者一兩間啫。你見英超德甲都係，拎走迫悉匙或拜仁多蒙特，個R²即時跌到去極低。西甲呢？拎走頭兩或頭三都好，都係跌，但冇咁誇張的
好，進階版，幾句講完。重覆一次，拎走咗皇馬，巴塞就由紅圈變藍圈。但拎走巴塞都好，皇馬都仲係藍圈。再講一次，皇馬廢先顯出巴塞勁（用錢方面），但沒有巴塞比較皇馬都仲係廢。
兩隊拎走晒又點？就變到以下咁：
皇馬巴塞以外，啲人工都算洗得精明。你見，個圖都係幾靚的，R² 仲有66%。馬體會華倫西亞西維爾都正正在條線上。真係好離譜嘅，咪降班三隊，同埋人工第六排名尾六嘅維拉利爾。叻仔嘅？咪基達菲，同愛斯賓奴。
馬體會真係同剩低17隊唔同。人工差不多係華倫西亞西維爾夾埋，所以我覺得真係另一班波。英超德甲第三同打後一定冇爭咁遠
如果拎走馬體會，剩低17隊呢？就變咗咁：
其實個圖嘅形狀冇乜點變，只係將18隊（冇皇馬巴塞有馬體會）斬出嚟咁（因為馬體會都在線上）。你見R²都大跌，但合理，除咗細會真係冇咁精外，亦因為基數細，爭幾分爭幾球（錢）就影響好大。拎走晒啲班霸都仲有0.43，其實高過德甲英超（英超冇迫悉匙去到0.37，德甲冇拜仁多蒙特係0.26）。
