Melissa Reddy：雲迪克欲簽新約長留利記 | Liverpudlian Ty
根據 Melissa Reddy，以及 ESPN FC 所得嘅消息，雲迪克告知利物浦，佢想簽一份新約。
呢位現時世上最貴嘅後衛，喺 2018 年 1 月，以 £75M 轉會費，由修咸頓加盟利物浦，簽約 5 年半。不過，佢已經熱衷於繼續留喺利物浦。
現年 27 歲嘅雲迪克，喺利物浦奪得歐聯冠軍之前，已經表達咗呢個意願。佢嘅出色表現，協助紅軍第 6 次奪得歐聯冠軍，亦係高普執教利物浦以來，贏取嘅第一個錦標。
鑑於雲迪克嘅合約年期，同埋利物浦喺季尾繁忙嘅賽程，所以雙方都並唔急於展開正式會談，同埋雲迪克現時喺荷蘭國家隊，備戰歐洲國家聯賽。
利物浦同雲迪克嘅經理人，都對續約事宜持輕鬆嘅態度，並且有信心以冇咩困難嘅情況下，就續約條件達成協議。
雲迪克本身已經係利物浦隊中最高薪嘅球員之一，佢喺球隊嘅地位，從佢僅次於軒達臣及占士米拿，成為第三隊長，可見一斑。成為今季英格蘭職業足球員協會最佳球員，並且亦係荷蘭國家隊隊長嘅雲迪克，被預期有相當機會繼 2006 年嘅簡拿華路之後，另一位成為金球獎得主嘅後衛。
同一位表現卓越嘅球員續約，可見利物浦延續留住核心球員方面作出投資嘅政策，並且確保為新一代嘅球員開啟發展道路，而唔係於今夏大灑金錢。
當然，如果喺可以接受嘅條件下，能夠得到頭號目標球員嘅話，球會將採取行動，但係會優先考慮嘅係，確保球隊陣容嘅延續性，同埋增加陣容嘅深度。
費明奴、沙拿、軒達臣、文尼、祖高美斯、羅拔臣及阿歷山大阿諾都已經喺上年簽署新約。此外，利物浦亦會給予祖爾馬迪普及占士米拿一份新約。
另外，根據 ESPN FC 所得到嘅消息，高普喺 2022 年約滿後，或會想休息一年。同時，利物浦班主 FSG 希望高普會續約，不過唔會俾壓力佢。
