奧歷治盼望與紅軍續約談判順利 | Liverpudlian Ty
喺歐聯決賽為利物浦射入第二球嘅奧歷治，希望喺嚟緊呢幾個星期，同利物浦嘅續約談判，會係「正面」嘅。
雖然只有 6 場賽事正選上陣，但係奧歷治已經成為利物浦球迷所崇拜嘅英雄人物。
現年 24 歲嘅奧歷治，喺英超對愛華頓及紐卡素嘅賽事，都射入重要嘅入球。喺歐聯四強次回合大勝巴塞隆拿嘅賽事，佢梅開二度。此外，佢喺歐聯決賽對熱刺射入第二球，協助利物浦奪得歐聯冠軍，名留紅軍史冊。
奧歷治表示：「我想同球會，以及我身邊嘅人內部傾咗先，然後先至公開。但係希望我、球會同我身邊嘅人展開嘅會談將會係正面嘅。」
呢位比利時國腳同利物浦嘅合約剩番最後 12 個月。鑑於佢嘅表現同埋喺賽事上展現嘅影響力，利物浦考慮延長佢嘅合約。
現時喺比利時國家隊，備戰對哈薩克同蘇格蘭嘅 2020 年歐洲國家盃外圍賽嘅奧歷治話：「嚟緊呢幾個星期，我哋將會坐低傾，睇吓會係何去何從。」
「宜家我只想專注喺比利時國家隊嗰幾場賽事，然後再睇吓點。」
奧歷治向 Skysports 表示，佢已經放眼於利物浦下季聯賽冠軍嘅爭奪。利物浦喺剛過去嘅球季只差曼城 1 分，未能成為聯賽冠軍。
佢話：「呢個係我哋想邁進嘅一個重大目標。今年喺聯賽嘅經驗，同埋成為歐聯冠軍，會對我哋有幫助。能夠贏到嘅話，會係一件美好嘅事。」
「但係，我哋不如一齊享受我哋所做到嘅嘢 (贏得歐聯冠軍)，同埋為下個球季重新設定一啲目標。」
