德甲人工性價比：拜仁大水魚（吹咩？），多蒙特都只係OK，最叻係……？| 李聲揚
上篇英超人工性價比，都算係受歡迎。最重要係個圖。人工買到成功就固然，美斯唔使出糧咩。但上次個圖都大約見到，有一個OK強的線性關係。同埋解咗比你知，唔係 「正比例」，所以計咩平均一分使幾錢，係錯嘅。再講一次， 「正比例」係線性關係嘅特例。所有「正比例」都係線性關係，但唔係所有線性關係都係「正比例」，明冇？
咁既然大家有咗個基本認識，我個model又喺埋度，就梗係應用落去其他聯賽，呃多幾篇文啦（話你知，好多出學術論文嘅都係咁上下）。
寫得英超，當然寫埋西甲德甲意甲。法甲應該唔會。但反而日聯可能會寫。如果有可靠數據可能我會寫中超，甚至港超，你有嘅不妨比我。當然中超啲人工係咪可信又另一問題。
英超後，其實我寫德甲，唔係更受歡迎（香港啦下）嘅西甲。因為寫呢篇文時德甲煞咗科，西甲未（意甲都未）。放心，忍下，寫完德甲會有西甲意甲。
同英超篇文一樣，我在圖上面係用Three Letter Code。但英超隊你可能識晒，德甲未必，所以送埋個聯賽榜比你參考，亦知道邊隊打邊隊。
以下係德甲各隊嘅球員平均人工，年薪，百萬美金，呢個網站應該可靠，我都double check過下。
再講一次，百萬美金計，年薪，同埋係隊內平均。唔係拜仁咁多個夾埋先一年836萬美金，係平均每個。
呢堆數字，整做上次嘅圖出嚟，就係以下咁。相當有趣的。照舊，紅色代表使得英明（橙色都係，錯手，OK？），綠色嘅不過不失，藍色嘅係水魚。
又係看圖作文時間，應該睇到以下嘅東西：
1. 都仲係人工越高，分數越高，但關係唔太明顯！留意有個叫R²的東西，德甲只係得0.49。英超個圖講緊係0.7（上次冇放上圖，但內文有提）。呢舊嘢有點深，但大約理解為：聯賽分數有幾多（百分比）可以用人工嚟解釋。英超，人工解釋咗7成，可以話好有效率，好少水魚，又或者冇乜趣，任你點解釋。德甲呢，唔知係刺激定啲友太9，人工只解釋咗分數嘅一半都冇。同英超分別好大。
2. 拜仁真係另一班波。你睇啲開支係第二位多蒙特嘅一個開咁滯。亦係人工包尾嗰隊嘅20倍咁滯。咁分數梗係唔會係多蒙特一個開，或者包尾嗰隊20倍啦。所以其實睇完個人工數字都估到拜仁一定係藍色圈，水魚。
3. 所以你話德甲好平等，假嘅。英超開支最高同最低，都未夠7倍。我相信英超啲人工冇爭咁遠，原因正係因為廣播費分得比較勻，細會都可以負擔到相對地高嘅人工。
4. 多蒙特其實亦都係另一班波。在圖上你見到，開支近400萬美金。其他冇一隊過到300萬。拜仁當然係大水魚，但其實多蒙特亦只係因為有拜仁呢條大水魚，先望落好似洗得精明，陣間會再講。
5. 剩返嘅，就大混戰。所以其實德甲係三級制，拜仁，多蒙特，及其他人（英超你可以當兩級，迫悉時，同其他人）。
6. 真正洗得精明嘅，冇乜人估到，係RB萊比錫。好多球迷勁憎隊波，但就事論事，佢地唔係以本傷人，至少人工上唔係，而踢出嚟其實係outperform。
7. 兩隊商業背景濃厚嘅球會，利華古遜同狼堡，不過不失。但真係有睇德甲會發現，佢地係下半季尾段先發力。但你咪理，總之結果係對得住球迷。好奇怪不停有人覺得利華古遜係德甲之恥，實情近年佢地唔算差。
8. 洗得錢多而冇成績嘅大水魚，當然係史浩克零四。計絶對相對計都係佢地最差。人工第四，分數尾五。去到尾幾輪都仲護緊級。
9. 三隊降班嘅，都係藍圈，仲要爭好遠嗰隻。留意同英超有啲唔同。卡迪夫城係降班，但叫做降得物有所值，係咁嘅人工交咁嘅貨。但德甲唔同。史特加固然離譜，中游開支排尾三。但，紐倫堡雖然人工包尾分數又包尾，但不等於就 「恰如其份」（同卡迪夫嘅情況比下就明），正如拜仁分數第一人工第一亦不等於洗得精明。簡單嚟講，紐倫堡值得包尾，但唔應該咁低分。
10. 最後都係講返拜仁。你睇到真係大水魚嚟的，係冠軍，但人工不成比例地高—亦都解釋到點解啲德國球員個個都去拜仁（例如呢刻傳曼城嘅利萊桑尼返德甲，基本上只有拜仁畀到佢份糧）。不過又可以解釋下。拜仁嘅目光唔止放在德甲。固然今季德甲都係好核突地去到最後一場先封王，同佢地人工不成正比。但，假想實驗就係，佢地如果只係想拎德甲，其實可能真係唔使咁高人工。不過拎到出歐洲賽就另一回事。可惜歐洲賽難做呢啲統計（因為可能要計五屆先準），你有興趣可以做。我相信在歐洲賽上，拜仁並唔算太過水魚的。但掉轉頭，咁嘅人工打德甲理應掃晒，好似哥迪奧拿年代咁三月捧德甲先係應份，而家明顯係underperform。
好，part 2。梗係唔係完全照英超篇文再玩啦。我冇咁衰。
頭先講過，多蒙特同其他隊比都係另一班，拜仁就更加再高一班。咁聰明嘅小朋友梗係諗下，如果冇咗呢兩隊，又會點？係幾有趣的。
順手講埋，既然話英超兩個組別，迫悉匙同其他，咁拎走迫悉匙係點？答案係，原來啲水魚同精明名單冇乜變的。依然係狼隊屈福特精明，修咸頓富咸赫德士菲水魚。冇分別。所以唔寫（唯一分別係個R² 細咗好多，0.7變到0.37，證明下面啲友係亂咁嚟的，大會就冇死錯人）。
講返德甲，拎走咗拜仁後，德甲ex拜仁，17隊，係咁嘅情況：
唔講太多，但即時見到幾樣嘢。首先，拜仁缺席下，多蒙特仲係精明，但唔算好明顯。反而RB萊比錫依然係咁精。利華古遜狼堡繼續係恰如其份，史浩克史特加等等依然係倒錢落海。同埋最後留意，個R² 不過係0.49變到0.44。你可以比較下，其實有冇拜仁，張圖嘅形狀唔係變得好多。
咁嚟多張，如果冇埋多蒙特又點呀？就勁咯。留意我用嘅比例刻度都一樣，但個圖幾明顯唔同咗。
大方向，其實冇乜點變，水魚精明恰如其份都係嗰堆。唯一值得講，係個R²大跌。同英超一樣，再一次證明，大會固然以本傷人做水魚（特別係拜仁呢個畸屎），但，啲細會出糧，都真係亂9咁嚟，有好大改善空間。想搵食，教波或做數據分析員嘅，就梗係搵呢啲會。
下篇講西甲，預告定。又同德甲英超唔多同。等意甲踢完就寫埋意甲。
