根據 The Telegraph 嘅 Chris Bascombe，利物浦將於歐聯決賽後，與占士米拿及祖爾馬迪普續約。
占士米拿已經成為高普麾下嘅重要一員，雖然佢已經踏入 33 歲。佢現時仲有 1 年合約，利物浦將會想留佢起碼去到 2021 年。
利物浦對於占士米拿呢個安排，會類似曼聯領隊費格遜當時對於隊中 30 歲或以上嘅球員嘅做法，每季都會檢視佢哋嘅合約。
雖然占士米拿已經去到呢個年紀，但係佢仍然係隊中其中一個最 fit 嘅球員。
以波士文條例下，自由轉會利物浦嘅祖爾馬迪普，同利物浦嘅合約亦係剩番 1 年。佢喺下半季夥拍雲迪克鎮守後防嘅表現不俗，利物浦亦都將會同佢開出一份新約。
同時，利物浦已經終止同熱刺洽談使用該倫敦球會新主場踢季前熱身賽嘅事宜。
高普想喺 7 月尾使用熱刺新球場嘅計劃，因為雙方將於歐聯決賽對壘而告吹。利物浦視熱刺嘅新球場，作為屆時代替晏菲路之用，但係宜家睇嚟唔係咁合適，因為喺歐聯決賽後，其中一隊需要從失落同傷感中恢復過來。
另外，利物浦亦都考慮緊以愛丁堡嘅 Murrayfield，作為 7 月 28 日進行季前熱身賽嘅場地。晏菲路喺 7 月尾未能使用，因為到時會舉行夏日流行及搖滾音樂會。
喺愛丁堡嘅賽程，會喺利物浦夏天嘅美國之旅後進行。紅軍會喺美國嘅印第安納、波士頓及紐約，與多蒙特、西維爾及士砵亭進行友賽。佢哋亦都會喺法國嘅 Evian 進行集訓營。
利物浦喺今個夏天肯定會有一場波喺倫敦舉行，因為佢哋將會喺 8 月要踢英格蘭社區盾賽事，對手係曼城。想啲球迷專程嚟到倫敦一趟亦係考慮因素之一。
起初，利物浦搵熱刺傾使用佢哋嘅新主場，係對雙方都有利。因為利物浦想邀請著名嘅歐洲球會進行友賽，同埋熱刺渴望增加球場嘅使用率。
熱刺已經同美國嘅 NFL 建立合作夥伴關係，並且將會喺佢哋嘅新主場上演兩場美式足球賽事，分別係 10 月 6 日，Chicago Bears 對 Oakland Raiders；同埋 10 月 13 日，Carolina Panthers 對 Tampa Bay Buccaneers。
利物浦仍然打算喺新球季開始之前，安排另一場友賽。
