高普：村姑變super model，利記自會吸引最出色球員來投 | Liverpudlian Ty
利物浦領隊高普表示，紅軍持續地追求成功，會更容易吸引世上最優秀嘅球員加盟。
利物浦喺過去幾年，喺羅致球員方面，做得相當唔錯，高普與體育總監米高愛華士嘅合作，帶來一啲歐洲最出色嘅人才嚟到紅軍。
喺歐聯四強次回合，主場大勝巴塞隆拿嘅賽事，有多達 6 位球員係最近 3 年羅致嘅。其中後備入替，並且梅開二度嘅韋拿杜姆，係喺 2016 年夏天，由紐卡素加盟，轉會費 £25M。
如果當時沙拿同埋拿比基達都能夠上陣嘅話，呢個人數就會更多。利物浦近年來嘅轉會操作，逐漸得到唔少歐洲球會嘅艷羨目光。
由 2017 年開始，喺過去嘅幾個轉會窗，利物浦並冇漠視現實嘅需要，致力收購球員加盟。當中包括沙拿 (£36.9M)、張伯倫 (£35M)、雲迪克 (£75M)、拿比基達 (£52.25M)、法賓奴 (£40M) 及艾利臣 (£65M)。
自從由米高愛華士喺 2016 年 11 月，升任體育總監以來，以數據主導嘅模式嚟羅致球員，利物浦喺轉會市場上，好少出現錯誤。
如是者，利物浦喺過去嘅兩個球季，喺球場上嘅急速冒起同埋所展現嘅競爭力，令到高普覺得，已經唔需要向羅致目標硬銷利物浦。
咁樣意味著，當利物浦開始進入今夏轉會市場嘅時候，將會令高普更容易地羅致到佢嘅首選。
前利物浦球員加歷查代表《每日電訊報》訪問高普，高普表示：「如果我嘗試簽下球員，我唔再需要說服球員，同埋話俾佢哋知，乜嘢係利物浦，呢個係明顯嘅。」
「對巴塞隆拿嗰兩場波，同以往嚟比，我從來未試過收到咁多嘅訊息。所有人都有睇，同埋喺度諗「嘩！呢個係咩事呀？」我從來未試過就球隊嘅表現，收到咁多嘅讚美。」
「我唔知道有幾多人睇咗，但係世界上應該會有一部份人睇。令到場波變得特別 – 一場比賽，一場四強賽事。喺呢個星球上，冇其他嘅賽事係咁萬眾矚目嘅。」
利物浦將於週末，連續兩年參加歐聯決賽。佢哋會喺西班牙馬德里嘅 Wanda Metropolitano 球場，與熱刺爭奪歐聯冠軍。
紅軍喺首回合，作客巴塞隆拿以 0-3 落敗，不過喺次回合扭轉劣勢，憑著奧歷治及韋拿杜姆梅開二度，喺主場大勝該西甲球會 4-0，締造球會史上另一經典戰役，晉身歐聯決賽。高普認為，利物浦嘅進步，令到佢哋成為歐洲最佳球隊之一。
高普補充：「所有同足球有關嘅人士都知道，對巴塞隆拿場波係相當特別，同埋呢個喺你嘅人生之中，唔係經常可以見到架。」
「利物浦已經由一個喺村落中唔係最吸引人嘅女仔，變成一個超級模特兒。我哋再次成為歐洲頭五、六間最佳嘅球會之一。」
「我唔知道呢個係咩時候出現咗呢個情況，但應該係唔算好耐之前。」
「呢個就係點解我為周邊嘅人感到高興。佢哋見到球會處於嘅位置，同埋會諗『睇吓呢個，睇吓呢個紅色，呢個係利物浦。』呢個就係我哋宜家嘅感覺喇。」
