高普：歐聯奪冠將會是我人生最重要的里程碑 | Liverpudlian Ty
利物浦將於西班牙馬德里與同樣來自英超嘅熱刺，爭奪歐聯冠軍嘅殊榮，登上歐洲之巔。領隊高普、後衛祖爾馬迪普及中場韋拿杜姆出席賽前記者招待會，主要內容如下：
1. 高普表示：「再次有機會嚟到歐聯決賽，我哋都感到非常興奮。我哋可能比較有經驗，但並唔表示咁樣真係會有實際上唔同嘅地方。呢個係講緊點樣去面對同埋處理呢種情況，同埋到目前為止，我哋嘅情緒控制做得好好。」
2. 高普話：「呢個時候，係純粹嘅興奮。」另外，高普確認，拿比基達「冇機會」喺歐聯決賽中上陣，至於費明奴，「所有嘢都良好，佢將會喺聽日開始，同隊友一齊操練。到目前為止，我哋睇到嘅所有嘢都真係唔錯。我頗為肯定，佢將會冇咩問題。」
3. 高普話：「我從未試過同一隊比宜家呢隊更好嘅球隊一齊參加歐聯決賽。」
4. 高普表示：「呢個係一個令人感動，同埋美妙嘅情況。我哋想奪得呢項錦標，但係一度睇嚟會喺分組賽嘅時候，喺我哋身邊溜走，當其時我哋喺作客嘅賽事遇上困難。但係我哋用最成熟嘅方式面對上述情況，以 1-0 擊敗一支意大利球隊。自此以後，我哋喺作客賽事嘅表現都唔錯。」
5. 高普話：「個計劃係再次晉身歐聯決賽。宜家我哋嚟到呢個階段，呢個係令人難以置信嘅。基輔一役係我哋球隊發展嘅開始，100% 係。宜家呢隊球隊，唔應該攞上年嗰隊嚟同佢作出比較喇。」
6. 高普認為：「呢隊球隊最好嘅特點係不斷發展同進步嘅慾望。我用占士米拿嚟做例子，佢 33 歲，同埋佢仍然有大幅度同埋重要嘅發展與進步。球員經常都想邁向下一步，呢樣嘢對球隊嘅幫助好大。」
7. 高普表示：「我哋覺得呢個係一場真正嘅歐洲賽決賽，呢個就係佢哋同我哋點樣作出準備。」
8. 關於曼城領隊哥迪奧拿話，贏英超重要過贏歐聯，高普回應：「哥迪奧拿係要咁樣講嘅，因為佢已經有一段時間冇參與歐聯決賽！佢係一個偉大嘅領隊，同埋值得擁有所有對佢讚美。」
9. 高普話：「我哋今季兩場賽事都係贏熱刺 2-1，我哋曾經有相當唔錯嘅時候，令我認為我哋值得取勝。但係，尤其是係主場嗰場波，係一場好緊湊嘅賽事，並且帶點運氣。我哋呢場波嘅任務，係踢出我哋想踢嘅足球。」
10. 高普話：「我哋知道呢個係困難嘅賽事，熱刺亦然。所以不如我哋一齊去踢呢場困難嘅賽事，同埋取得勝利啦。」
11. 被問到宜家會唔會係執教生涯最重大嘅時刻，高普回應：「哦，一定係。直至現時為止，我執教生涯最重大嘅時刻，係 2004 年帶領緬恩斯升班。如果能夠同利物浦一齊奪得歐聯冠軍嘅話，咁我會再諗一諗。」
12. 高普表示：「我哋要對唔同嘅情況作好準備，同埋準備面對犯錯。呢個係一場重要嘅賽事，全世界都會睇嘅，就好似對巴塞隆拿咁。同埋我哋準備面對犯錯，並且將之修正。」
13. 高普認為：「如果你問我寧願休息三日，定係三個星期，我會揀三個星期。熱刺曾經有傷兵問題，宜家唔少都已經冇乜事。費明奴亦都可以利用決賽前嘅呢段時間復原。我哋喺上星期六踢咗一場閉門作賽嘅賽事，以便能夠保持狀態同埋節奏，我哋會感到更有新鮮感。」
14. 高普話：「你要隨時隨地去提醒自己，我哋隊波有幾強。」
15. 高普表示：「荷蘭人喺今季歐聯賽事嘅影響力係大嘅，雲迪克及韋拿杜姆對我哋有好大嘅影響力。唔止佢兩個，仲有連達斯同埋艾達貝治添，我哋都從中得益。老實講，我都冇足夠嘅時間去講關於佢哋正面嘅事情！」
16. 高普認為：「上年歐聯決賽唔係只係因為沙拿傷出，仲有係喺最後一刻，我哋只有拉蘭拿作為替補人選。我哋當其時已有其他嘅傷兵，例如張伯倫，令到我哋喺呢方面嘅人選比較少。我哋今次會有所有可以候命嘅球員喺後備席上，令我哋會有唔同嘅解決方案。」
17. 被問到如果費明奴未夠狀態，會否想再踢前鋒，韋拿杜姆回應：「我比較喜歡踢中場，同埋奧歷治及史杜歷治係較好嘅人選，但係如果領隊要我去踢嘅話 …… 」
18. 韋拿杜姆話：「個人嚟講，我唔感到有壓力，我只係將佢視為一個可以贏取錦標嘅機會。我哋只需要確保已經準備就緒，同埋付出所有去贏呢場賽事。」
19. 祖爾馬迪普表示：「我哋應該只係去嘗試享受可以贏取錦標嘅機會，同埋做好我哋嘅事去取勝。我哋已經煥然一新，操練得相當唔錯，並且狀態良好。」
20. 被問到比較想面對孫興民，定係哈利簡尼，祖爾馬迪普話：「其實冇乜所謂，我哋會以團隊嘅方式做好防守。」
21. 祖爾馬迪普表示：「我經常都相信自己。宜家我有呢個機會去踢，我會好好把握。我哋擁有豐厚嘅質素同能力，係一隊好球隊。能夠成為當中嘅一份子，係一件好事。」
22. 韋拿杜姆話：「我唔會去諗邊隊係咪大熱門，兩隊都有機會贏呢場賽事。所有人都話我哋機會比較大，因為我哋喺聯賽嘅排名較高，贏過佢哋兩次。但係如果你睇返，特別係第二場波，過程其實係頗為困難嘅，當時睇落似會 1-1 完場咁。」
23. 被問到以前係紐卡素嘅隊友，現時效力熱刺嘅莫沙施素高，韋拿杜姆表示：「當我加盟紐卡素嘅時候，佢係第一個帶我出去食嘢架。我哋嘅關係良好，兼且仲有傾計同埋互相祝賀對方晉身歐聯決賽。喺決賽嘅時候，我哋會有 95 分鐘唔係朋友！」
24. 韋拿杜姆話：「有咩想同球迷講？多謝你哋嘅支持！係球迷令到我哋能夠喺主場贏巴塞隆拿 4-0。喺剛剛過去嘅球季，有佢哋嘅支持真係好好！呢個係對球迷嘅讚美。對於一啲未能得到門票嘅球迷，我感到遺憾，其實所有人都值得嚟到呢度。」
