應屆歐聯冠軍將不能參加世界冠軍球會盃？| Liverpudlian Ty
無論今次能否奪得歐聯冠軍，利物浦、熱刺都冇得參加世界冠軍球會盃。
以往嘅歐聯冠軍，每一年都會參加呢項喺冬季舉行嘅賽事。
皇家馬德里係現時世界冠軍球會盃嘅得主，佢哋喺上年嘅歐聯決賽擊敗利物浦，成為歐聯冠軍，並且喺 12 月以 4-1 擊敗來自亞洲嘅艾阿里，奪得世冠盃。
但係呢項賽事嚟緊會有大幅度嘅變化，意味著喺 2019 年將無法舉行，國際足協喺 3 月為一個四年一度嘅比賽方案開咗綠燈。
24 支球隊會將於 2021 年，首次競逐呢個以新形式進行嘅賽事，據報利物浦係首八支被邀請參加嘅球隊之一。
比賽將於 6 月至 7 月，喺現時國際賽事時段期間舉行，至於洲際國家盃，則會被廢除。
國際足協主席恩芬天奴對於能夠通過落實新嘅比賽形式表示高興，並且希望歐洲列強會對世冠盃更加重視。
恩芬天奴表示：「宜家整個世界都將會見到真正嘅世界冠軍球會盃，球迷將會見到世上最佳嘅球會，競逐成為真正嘅世界冠軍。」
「我哋希望所有最好嘅球會將會參與，同埋我哋與歐洲足協有好正面嘅討論。」
「但係呢個係我哋嘅責任去作出決定，因為我哋要處理關於組織方面嘅事務，宜家只係剩番兩年嘅時間。」
但係會有邊啲歐洲球會參加，實屬疑問。因為歐洲球會協會 (European Club Association) 已經發出聲明，會杯葛呢項賽事，而利物浦係歐洲球會協會嘅會員之一。
根據 BBC 報道，有一封由會員簽署嘅信件，當中包括曼聯，信中表示「我哋堅決反對就修改世界冠軍球會盃嘅任何潛在落實嘅方案，唔會有歐洲球會協會嘅會員參加。」
比賽中會包括 6 隊來自南美洲，非洲、亞洲及中北美洲各有 3 隊，仲有 1 隊來自大洋洲。
BBC 嘅報道話，每間參加嘅球會，剩係參加賽事，都會有 £50M 嘅獎金。如果能夠晉級嘅話，獎金最高可達 £100M。
根據上年英國 《泰晤士報》嘅報道，喺利物浦與皇家馬德里爭奪歐聯冠軍之前，利物浦係第一批獲邀嘅球會，其他球會包括曼聯、皇家馬德里、巴塞隆拿、AC 米蘭、拜仁慕尼黑、阿積士、祖雲達斯及國際米蘭。
雖然後來有報道表示，獲邀請嘅歐洲球會，會係過去四個球季嘅歐聯冠軍、歐聯亞軍同埋歐霸盃冠軍，並且包括有世冠盃賽事嗰年，上述歐洲錦標嘅得主。
利物浦從未奪得世界冠軍球會盃。2005 年，利物浦喺日本對巴西嘅聖保羅，以 0-1 落敗。另外，喺 1981 年嘅洲際盃，以 0-3 不敵巴西嘅法林明高。
