阿士東維拉對打比郡 | 夕二工八

英冠已經係次級聯賽，呢兩隊仲要冇得直接升班，啲咁嘅垃圾波，有咩好睇？

1. 第五對第六，僅熟對僅熟

維拉季中曾經落到中游位置，但隨住死敵伯明翰被扣九分，再加上周柏豪傷愈復出連勝十場，最終第五衝線。

季後賽準決賽對住第五嘅西布朗則受惠於兩個紅牌。首回合維拉贏二比一，Dwight Gayle完場前領紅搞到次回合冇得出，不過西布朗喺次回合早段已經追平，士氣大勇，係咁撳住維拉嚟踢，之但係喺十分鐘度就完場呢個moment西布朗就自爆，Chris Brunt連番侵犯John McGinn之下兩黃一紅，形勢逆轉，西布朗最終十二碼輸埋，維拉喺驚濤駭浪下晉級。

打比則一直喺季後賽位置上下浮浮沉沉，但隨住伯明翰被扣九分，再加上Mason Mount傷愈復出後越戰越勇，臨尾六場不敗僅僅壓過米堡，終以第六衝線。

季後賽準決賽對住第三嘅列斯聯則受惠於一個紅牌。首回合打比輸零比一，次回合兩隊一路咬住總比數三比三，然而喺仲有十分鐘度就完場呢個moment列斯就自爆，Gaetano Berardi魯莽侵犯Bradley Johnson兩黃一紅，幾分鐘後Jack Marriott絕殺列斯，打比喺驚濤駭浪下晉級。

2. 維拉兩架車，打比四架車

車路士名將泰利上季喺維拉退休，今季則成為教練團一份子，主責訓練後防。維拉今年啲中堅同龍門傷完又傷，總計有六個CB三個GK走馬上任，但仍算守得穩陣，泰利應記一功。

後場有泰利關照，前場Tammy Abraham就簡直係維拉嘅壇蜜，佢以廿五球位列英冠射手榜第二，亦係維拉嘅十二碼劊子手，對西布朗最後一球12碼就係由佢射入。

打比郡就有另一車路士名將林柏特領軍。雖則車仔不嬲都係英冠借將嘅貨源，不過有林伯喺度，借嘅嘢都靚啲，Mason Mount同Fikayo Tomori絕對係打比今季嘅命脈，Mount被譽為新林伯特，而中堅Tomori則被選為Fans Player of the Year。

除咗兩個年輕借將，仲有一個老漢跟車。左閘艾殊利高爾喺林伯特多番遊說下終於喺季中加盟，預計佢會喺決賽以正選姿態上陣。呢場波簡直係車路士re u。

3. 維拉的identity，打比的spygate

維拉青訓一向腳頭好，離開母會之後就會攞冠軍，車路士嘅加利卡希爾同李斯特城嘅艾伯禮頓，簡直係阿士東維拉嘅田蕊妮同陳展鵬。賣曬啲優質青訓走，咁維拉喺降班之前買咗啲乜嘢人返嚟？咪米卡李察士、尼史葛之輩囉，身形肥合約更肥，係維拉而家財政仲係危危乎嘅其中一個原因。隊中缺乏自家青訓，只遺留一堆肥約過氣球星，加上上任領隊係教過死敵伯明翰嘅布魯士，維拉一度陷入身份危機。

嚟到今季，一切終於撥亂反正。首先係宣佈會着Luke1977呢個本土品牌嘅波衫，老闆係維拉fans；之後就到新帥Dean Smith嘅上任，佢亦都係維拉嘅fans；跟住仲有任命基利殊做隊長，加上另一青訓Andre Green漸漸上位，昔日嘅中部盟主，似乎已經漸漸慢搵番自己嘅identity。

打比郡同列斯聯過往應該冇乜牙齒印，不過今屆兩隊嘅關係就異常緊張，講緊嘅當然就係季初「偵探門」事件。

話說打比喺訓練場附近捉到個列斯職員，疑似偷睇打比郡嘅操練。列斯領隊比爾沙急急召開記者會，大家都諗緊應該都幾老尷嘅比爾沙點樣拆招甚至引咎辭職，點知比帥唔單止直認偷睇你練波，仲將記者會變成對手戰術教學大會，話俾大家知how deep is their spy。如此新奇刺激有趣嘅記者會，令到英媒突然轉曬風向，對比專業更專業嘅比帥心悅誠服。此舉當然激到林柏特紮紮跳，堅持咁樣探聽軍情係唔啱之餘，更加話如果要佢咁做佢情願唔教波。

冇乜人諗過最後跌列斯聯會跌到落第三，打比郡又升到上第六， 呢個季後賽準決賽組合簡直係冤家路窄。第一回合已經 出現好多爭議性判決，第二回合重要咁樣奇蹟反勝，令到打比郡成為史上第一隊第一回合主場輸波但作客反勝進入決賽嘅球隊，球員瘋狂慶祝之餘，仲齊齊用手做望遠鏡手勢，擺明仲將季初件事攞返出嚟剃對手眼眉，林伯賽後亦不諱言偵探門事件令佢今次贏波格外開心。

一隊復興中，一隊很風騷，但兩隊只能升一隊，另一隊只能回到起點重頭上路……

4. 預測？

季後賽準決賽嘅第二回合係一個好好嘅參考。維拉同打比都喺作客嘅情況備受壓力，都係踢得冇乜章法，但比較上打比係表現好啲嗰隊，有Harry Wilson同Mason Mount兩個wonderkid單打獨鬥已經夠贏列斯。相反維拉喺對西布朗時，受壓下基本上係踢返之前布魯士時期啲波，毫無組織可言，柏豪太想出頭做英雄，可惜弄巧反拙。

預計兩隊喺緊張嘅情況下都係會帶返上一場啲亂嚟波去溫布萊，如是者，第六嘅打比郡應該秤先。

今晚十點，要睇問 #link昆 攞拎，或者去中環嘅The Globe同 #香港維拉球迷會 一齊睇波啦！

夕二工八