利物浦中場拿比基達入選畿內亞嘅非洲國家盃 25 人初選名單。拿比基達嘅入選，令人關注佢嘅健康情況，同埋仲未知道佢能否參賽。佢喺 5 月 1 日，歐聯四強首回合，作客巴塞隆拿嘅時候受傷。
利物浦領隊高普曾經表示，拿比基達要抖兩個月，能否參與國家隊賽事嘅機會成疑，但係畿內亞國家隊主教練 Paul Put 隨即表示，佢哋會就拿比基達嘅傷，尋求其他嘅醫學意見。拿比基達有份前往西班牙嘅歐聯決賽集訓營，佢係 26 位球員之一，現時喺 Marbella 繼續進行康復療程。至於其他利物浦嘅隊友，則繼續為歐聯決賽作好準備。
高普向利物浦官方網站表示：「拿比基達嚟講，我會話係進展比預期快，但並唔係意味著佢會踢歐聯決賽。」
「佢宜家喺度做緊跑步之類嘅嘢，對於訓練強度嘅 50% 嚟講，佢感覺良好，但係佢仍然需要一段時間。」
「我知道關於畿內亞足總嘅事，如果個球員係可以去踢嘅話，我哋唔會唔俾佢踢。可能佢哋覺得個情況係咁，但係實際上並唔係咁。」
「對我嚟講，如果拿比基達 100% fit，兼且可以踢到非洲國家盃嘅話，係一件好事。呢個真係好老實，係 100% 嗰隻。但係我哋唔知，我哋要留意同監察住佢嘅情況，兼且需要同醫療團隊一齊努力。因為最終嚟講，如果個球員係 fit 嘅話，喺我嘅角度嚟睇，佢踢得嘅話，就應該去為國家隊上陣。」
「如果佢唔係 100% fit 嘅話，佢就唔能夠上陣，情況就係咁，呢個就係我哋係要嘗試確定嘅嘢。係為國家上陣，定係為球會上陣，呢個並唔重要。如果個情況良好，係好正面嘅話，我哋會睇吓有冇機會可以上陣。」
畿內亞國家隊將於 6 月 7 日及 6 月 11 日，分別與岡比亞及貝寧進行友賽。然後喺 6 月 22 日踢非洲國家盃決賽周嘅賽事，第一場嘅對手係馬達加斯加。
佢哋會喺 B 組，除咗馬達加斯加之外，仲有尼日利亞及布隆迪，但係現時未知拿比基達屆時能否參與呢啲賽事。
另一方面，喺西班牙集訓、備戰歐聯決賽嘅利物浦，星期六佢哋喺 Marbella，同賓菲加 B 隊 (即係預備組) 進行咗一場閉門友賽，結果利物浦以 3-0 擊敗咗呢隊喺葡甲聯賽角逐嘅賓菲加 B 隊。
由英超煞科日至歐聯決賽相距 20 日，利物浦領隊高普渴望安排一場練習賽。但係，大部份嘅歐洲聯賽已經結束，唔少球員已經放緊暑假，所以搵對手友賽係困難嘅。
喺兩個星期前，有荷蘭媒體報道，利物浦想同荷甲球會阿爾克馬爾進行友賽，但係被拒絕。
至於賓菲加，佢哋回應咗個 call 之後，嚟到 Marbella 嘅訓練場地，進行一場 90 分鐘嘅比賽。
高普同佢嘅利物浦大軍會喺星期日由西班牙返嚟英國，並且喺 Melwood 繼續進行準備工作，然後喺今個星期較後時間飛返西班牙。
至於對手熱刺，佢哋一直喺 Enfield 嘅訓練場地，並且搵埋佢哋嘅 U23 青年軍一齊參與操練。
熱刺將於星期三飛往馬德里，並且喺星期四及星期五，喺皇家馬德里嘅訓練場地操練。利物浦就會喺星期六早上，同樣使用皇馬嘅訓練場地進行操練。
