佳尼獲拿玻里青睞，甘馬曹或投狼隊｜Liverpudlian Ty
編按：各大媒體普遍相信利物浦唔會喺今夏大灑金錢之際，有兩名球員被外界青睞，就係佳尼（Nathaniel Clyne）同小將甘馬曹（Rafael Camacho）。佳尼被列入拿玻里嘅收購對象，甘馬曹有可能轉投狼隊或者士鉢亭。
根據前 Liverpool Echo 記者，現時於 goal 任職嘅 Neil Jones，意甲球會拿玻里對利物浦右閘佳尼有興趣。
佳尼喺剛結束嘅球季，借往般尼茅夫，現時吸引到有意甲球會對佢有興趣，佢喺今夏亦尋求離隊。
據了解，拿玻里喺今夏物色緊一位右閘球員，佢哋已就羅致佳尼嘅事宜，與利物浦接洽。
利物浦將佳尼標價 £15M，韋斯咸及般尼茅夫對佢有興趣。
此外，拿玻里亦都與熱刺後衛捷比亞扯上關係。不過實際情況係，現年 28 歲嘅佳尼同利物浦嘅合約已經進入最後一年，轉會費亦會比較平。至於捷比亞，就可能會超過 £25M。
佳尼喺 2015 年夏天，由修咸頓加盟利物浦，為紅軍上陣 103 次。
但係喺過去兩季，佢只係上陣咗 10 次，喺 2017-18 年球季，佢受到嚴重背傷影響。其後由於阿歷山大阿諾嘅冒起，表示希望得到上陣機會嘅佳尼，喺 1 月外借往般尼茅夫。
佢為般尼茅夫上陣 15 次，該英超球會對於將佢買斷表示歡迎。但係，佢哋現時要面對來自意甲球會嘅競爭。
利物浦將於今夏，將拒絕續約嘅葡萄牙小國腳翼鋒拉菲爾甘馬曹出售。
現年 19 歲嘅拉菲爾甘馬曹，與利物浦嘅合約只係剩番 12 個月，佢亦都已經告知體育總監米高愛華士，表示無意續約。
有見及此，利物浦將會考慮關於拉菲爾甘馬曹嘅報價，英超嘅狼隊及葡超球會士砵亭都對佢有興趣。
利物浦將會索價至少 £10M，但係如果唔到價嘅話，亦都準備喺下一年繼續留返佢喺度。
冇份去 Marbella 集訓營嘅甘馬曹，被曼城放棄之後，喺 2016 年試腳成功，加入利物浦青年軍。
上年夏天嘅季前美國之旅，拉菲爾甘馬曹嘅表現，令高普留下良好印象。喺 1 月份，足總盃對狼隊係佢首次正式為利物浦一隊上陣。及後，喺利物浦對水晶宮嘅聯賽，佢亦有後備入替。
拉菲爾甘馬曹為利物浦一隊上陣嘅時候，都係踢右閘，但係佢渴望喺今季嘅位置踢返前啲，以便可以展現佢嘅質素同能力。
佢喺利物浦 U23 對李斯特城 U23 嘅賽事中，大演帽子戲法後，喺社交媒體表達對球會教練團嘅質疑。佢話：「我唔知道係邊個嘅主意，但係我將會證明，佢哋係錯誤地理解我嘅足球。我唔係一個右後衛，我係一個會取得入球嘅攻擊球員。」
當拉菲爾甘馬曹勢將被出售，另一位年青翼鋒奧祖則面臨再一次嘅外借。
現年 21 歲，今季借往法甲球會蘭斯嘅奧祖，已經簽署一份 5 年嘅新約。蘇超球會格拉斯哥流浪渴望喺嚟緊嘅賽季能夠引入佢。
