利物浦最新轉會動向：關於出售球員收入、離隊小將計劃及萊特基利轉會｜Liverpudlian Ty
編按：以下關於利物浦的球員轉會動向，乃綜合《Liverpool Echo》的報道內容寫成。
出售球員收入
據 Liverpool Echo 了解，利物浦唔會喺夏天轉會窗花費大量金錢。領隊高普對於喺上季能夠問鼎聯賽及歐聯嘅球隊人腳感到滿意。
利物浦喺夏天轉會窗務求為球隊陣容作出微調，預料唔會好似 2018 年咁，用咗接近 £250M 轉會費羅致球員。雖然利物浦曾經喺上季歐聯決賽之前幾日，突然宣佈法賓奴以 £40M 轉會費，由法甲球會摩納哥加盟，令到球迷感到驚奇。
除此之外，利物浦透過出售邊緣球員，例如古積、哈利威爾遜及賴恩肯特等等，可能會收回大約 £100M 轉會費。呢班球員嘅將來，將會作出決定。
根據 James Pearce，利物浦喺夏天轉會窗期間，可能透過出售邊緣球員，從中獲得 £100M 。雖然被媒體將佢哋與歐洲唔同嘅球員扯上關係（當中包括阿積士中堅迪列治同埋祖雲達斯前鋒戴巴拿），但利物浦仍然唔太可能會喺夏天大灑金錢。
離隊名單
利物浦已經接獲唔少查詢，係關於佢哋外借後將會歸隊球員嘅事宜。領隊高普必需對此作出決定，尤其是古積同埋哈利威爾遜。
德甲球會哈化柏林渴望留住古積（Marko Grujić），呢位塞爾維亞中場外借哈化期間，表現不俗。現年 23 歲嘅古積，同利物浦嘅合約於 2023 年屆滿，利物浦將會索價超過 £20M。
哈利威爾遜（Harry Wilson）嘅標價，亦會同古積差唔多。現年 22 歲嘅佢，外借英冠球會打吡郡期間，有相當唔錯嘅表現。佢喺升班附加賽中，更取得一個入球同埋有一個助攻，協助打吡郡淘汰由阿根廷一代名帥，「狂人」比爾沙領軍嘅列斯聯，晉身決賽，將與阿士東維拉爭奪一個升上英超嘅席位。然而，利物浦將會考慮關於哈利威爾遜嘅報價，同埋亦都對將佢外借俾英超球會持開放態度。
佳尼（Nathaniel Clyne）亦睇嚟肯定喺外借完俾般尼茅夫之後離隊，利物浦會索價 £15M，韋斯咸對佢有興趣。
效力利物浦六年嘅比利時門將米奴列（Simon Mignolet）亦有可能會離隊。米奴列同利物浦嘅合約仲剩番兩年，成為艾利神後備嘅佢，渴望得到上陣機會，相信標價會係大約 £12M。
葡萄牙年青小將拉菲爾甘馬曹（Rafael Camacho）因為續約嘅問題談不攏，缺乏進展，佢喺利物浦嘅前途亦都成疑。本身係葡萄牙小國腳嘅拉菲爾甘馬曹，喺一月份對狼隊嘅足總盃賽事，首次為利物浦上陣。佢會被標價 £10M，包括士砵亭等球會對佢有興趣。
至於之前外借往弗賴堡同布里斯托城都唔係咁成功嘅賴恩肯特（Ryan Kent），佢今次外借由謝拉特執教嘅蘇超球會格拉斯哥流浪期間，表現唔錯，更取得蘇格蘭職業足球員協會最佳年青球員獎項，可謂喺蘇超聯賽，成功闖出一片天。格拉斯哥流浪領隊謝拉特渴望買斷賴恩肯特，但係利物浦作出 £12M 嘅標價，意味著呢位翼鋒球員來季可能會喺另一個地方繼續發展。
如果利物浦決定出售尼日利亞前鋒阿禾尼爾（Taiwo Awoniyi）嘅話，亦都會從中收到一定金額嘅轉會費。有「新耶堅尼」之稱嘅阿禾尼爾，喺 2015 年加盟利物浦以嚟，一直都未能取得工作證，無法為利物浦上陣。德甲球會史浩克 04 想羅致呢位尼日利亞 U23 前鋒，阿禾尼爾喺今季嘅下半季，外借比甲球會梅斯干嘅表現唔錯，利物浦將會索價大約 £10M。
至於奧祖（Sheyi Ojo）同埋艾查利亞（Ovie Ejaria），利物浦亦都會樂於接獲報價。前者外借往法甲球會蘭斯期間，上陣 19 次，射入 1 球。後者則外借往英冠球會雷丁，上陣 16 次，射入 1 球。
由於喺季前期間，利物浦有唔少主力球員要為所屬嘅國家隊，參與美洲國家盃及非洲國家盃，因此高普並唔急於縮減球隊嘅陣容。
目標人物：萊特基利轉投般尼茅夫
根據 Skysports 所得到嘅消息，般尼茅夫已就左後衛萊特基利（Lloyd Kelly）嘅轉會費與布里斯托城達成協議，價格為 £13M。
現年 20 歲嘅萊特基利，係一名左閘，但亦能踢中堅位置，今季為布里斯托城上陣 34 次，協助該英冠球會以第八名結束球季。
如果萊特基利加盟般尼茅夫嘅話，佢可能會壓過丹尼爾斯及迪亞高歷高喺隊中左閘嘅位置。
丹尼爾斯（Charlie Daniels）喺四月有嚴重嘅膝部傷患，令佢喺 2019 年嘅大部份時間都無法上陣。至於迪亞高歷高（Diego Rico），自從上年由西甲球會利根尼斯加盟以來，只為球隊上陣 12 次。
萊特基利出自布里斯托城青訓，並於 2017 年 8 月，對普利茅夫嘅聯賽盃賽事，首次為布里斯托城上陣。佢為布里斯托城上陣 48 次，並且為英格蘭 U21 上陣 3 次。
萊特基利一直有被媒體報道為利物浦嘅目標球員，加上摩蘭奴將於季後離隊，以致紅軍於今夏需要羅致能夠司職左閘嘅球員。其中 Times Sport 記者 Paul Joyce 亦於近日表示，萊特基利係紅軍嘅目標球員之一。以現時情況，究竟利物浦會否提升於青年軍備受好評嘅 Adam Lewis，或是轉往其他目標球員，則要拭目以待。
