曼城領隊哥迪奧拿似乎無法停止談及利物浦。佢相信曼城衛冕聯賽冠軍，並冇得到應得嘅尊重，同埋如果係利物浦贏咗嘅話，啲人就會覺得係「不可思議」嘅成就。
但係哥迪奧拿承認，佢嘅球隊唔能夠同 70 及 80 年代嘅利物浦相比。
利物浦喺上星期雖然取得球會史上最高嘅 97 分，可惜同曼城仍有一分之差，未能奪得聯賽冠軍，成為歐洲主要聯賽中，未能奪冠嘅最高分球隊。
奪得聯賽冠軍嘅曼城，現時仍被兩件事所影響，其一係職球員高唱嘲諷利物浦嘅歌曲事件，其二係歐洲足協就佢哋嘅財務違規行為仍在調查當中。
哥迪奧拿表示：「啲人唔鍾意勝利者。好似喺呢度啦，西班牙、意大利，邊度都係咁。我哋感覺到我哋嘅球迷，同埋相關嘅人，對我哋所做嘅嘢係滿意嘅。」
「我感覺到我哋嘅球迷喺街上，同埋收到啲人嘅來信，佢哋係非常滿意。」
「利物浦有 29 年未有贏得英超冠軍，啲人等待佢哋最終會贏到，呢個係正常嘅。」
「如果利物浦攞到英超冠軍，就會係一項『不可思議』嘅成就。但係如果由曼城攞到英超冠軍嘅話，情況就會係，『哦，OK 吖，呢個係成就嚟嘅。』」
「我認為我哋經歷咗難以置信嘅兩個球季，但係要成為最佳嘅話，係要持續更長嘅時間。我唔會話呢個係最佳，當你見到費格遜嘅曼聯同埋利物浦由皮士利執教嘅 80 年代。」
哥迪奧拿補充：「利物浦同曼聯有幾咁重要，喺《每日郵報》就可以搵到例子。上星期一嘅頭條，係講普巴喺主場同球迷之間嘅事，而唔係我哋攞到聯賽冠軍。」
「唔係因為我唔滿意《每日郵報》，我知道我哋唔可以同佢哋相比，所以呢個係我哋對過往十年感到極之滿意嘅原因。」
