就曼城職球員喺聯賽煞科日擊敗白禮頓，奪得英超冠軍後，被拍到高唱極具針對及嘲諷利物浦意味嘅歌曲事件，該隊領隊哥迪奧拿表示，對受到事件冒犯嘅人士致歉。
上述事件嘅影片見到曼城球員及職員，高唱由利物浦版本嘅 ‘Allez, Allez, Allez’ 改篇嘅歌曲，嘲諷利物浦。
曼城職球員所高唱嘅版本，歌詞內容據悉係同利物浦嘅希斯堡路球場慘劇，同埋喺上年歐聯四強對羅馬時被襲擊嘅利物浦球迷 Sean Cox 有關。
曼城曾經發出聲明，否認指控。但係該隊領隊哥迪奧拿喺星期六嘅英格蘭足總盃決賽前夕，對事件作出回應。佢表示：「呢個唔係想對希斯堡路球場所發生嘅事，或者對羅馬場波發生事故嘅該位男士作出冒犯。」
「你諗吓，只需要一秒鐘，你能夠想像到我哋試圖冒犯呢啲關於利物浦世界嘅悲劇嗎？呢個係難以想像嘅。」
「我哋當時為自己感到高興，如果有人受到冒犯，我感到抱歉，我對此致歉，但係呢個從來唔係我哋嘅意圖。我哋面對一個令人難以置信嘅競爭者，贏得英超冠軍，係困難嘅。」
哥迪奧拿承認，對於有人喺機上拍片而喺網上流傳感到關注，佢話：「你知道我對社交媒體有咩睇法。」
