於紐約交易所上市嘅曼聯，按照相關規則需要每三個月公佈季度業績。曼聯截至 31/3/2019 九個月業績重點如下:
商業收入：£208.4m，比去年度同期 （£212.4m） 下跌 2%.
電視播映收入：£200.3m，比去年度同期 （£165.4m） 上升21%，主要受惠於今季歐聯整體賽事獎金提升，與及本年度晉級八強（比對上年度十六強出局）而獲得更高獎金。
比賽日收入：£87.0m，比去年度同期 （£90.4m） 下跌 4%，基於門票價格並無提升，變動主要受期內比上年度少踢一場主場聯賽賽事影響。
總營業額： £495.7m vs £468.2m，上升 6%. 預計 2018/19 全年營業額額為 £615m-£630m，會係歷史新高。
薪酬開支：£239.7m，比去年度同期 （£214.7m） 上升 12%，當中已包含上一季度因解僱摩連奴同部分教練團隊成員而作出£19.6m賠償。薪酬開支對總營業額比例為48.3%，比去年同期 45.9% 高。主要原因，大家明啦。
稅前盈利: £57.5m，比去年同期（£63.2m） 下跌9%
正如上面提及，曼聯今季受惠歐聯整體奬金提升而錄得尚算唔錯嘅營業額，但係2019/20 球季曼聯未能參與歐聯，與及主要贊助收入受長期合約限制而缺乏大幅上升嘅空間。雖然來季英超收入有望受新一份播映權合同週期開展而上升，但相信曼聯 2019/20 球季業績可能會倒退。（有關曼聯下季無得踢歐聯會損失幾多獎金，與及目前 Big 6 嘅主要贊助金額同年期）。
曼聯球迷最關心嘅，相信係球會喺呢個轉會窗仲有冇能力收購具實力嘅球員幫助重建球隊。眾所週知，曼聯自從 2005 年被格拉沙家族收購後，已經變成全球負債金額最高嘅球會。但係近呢兩三季曼聯每季都花上過億英鎊收購球員，可見曼聯根本唔係俾唔起錢買人，只係買唔啱人！曼聯今個夏天最重要嘅任務，一定係認真招攬適合嘅球員，而唔係再盲目做水魚追求大牌球星！
曼聯球迷兼會計師一名，平時留意曼聯與及各大球會財務數據多過落場踢波，希望透過分享自己少少知識，同大家了解更多球場背後嘅操作。歡迎大家留言分嚮睇法或者想討論乜嘢話題。