其實擺明係侵權的，但實在覺得應該貼呢幾個圖。我就睇完架啦，但幾時都話本人嘅使命係提升讀者水平嘛，咁不能只有我看到。希望睇住我係訂戶份上唔好封殺我。大家想支持高質內容就去訂Financial Times 啦下。
How Man City and Liverpool set a football points record
Manchester City and Liverpool will finish first and second in the Premier League this season. FT senior data journalist John Burn-Murdoch examines how the two teams’ points totals and goal difference set a record for the best combined top-two performance
言歸正傳，其實我原本睇嘅係video of the day，樓上嗰段。後來我發現，佢啲圖都係循環再用嘅。咁就不如搵返原本嗰篇文出嚟講，樓下呢篇。
Why Liverpool and Manchester City have blown away football rivals
“Both Liverpool and us deserve the title,” said Josep “Pep” Guardiola, manager of Manchester City football club, at a recent press conference. His Liverpool counterpart, Jurgen Klopp, responded: “If we don’t do it, there are no regrets as long as we give it our best.”
不過呢篇文，頭半篇其實講所有英超隊。而其實我覺得講利物浦嗰部份先值得睇。
頭半先係講，英超好富貴。唔止係富豪球會好富貴，係全部都好富貴。每一間，係每一間球會，轉播費都至少分到1億英鎊。
而有點counter intuitive 嘅係，最「商業化」嘅英超，反而在分餅仔方面，係最均富嘅。轉播費同埋聯賽贊助嘅錢，分得好勻下。固然都係排名高分得多，但個餅分得相對地勻—同其他歐洲聯賽相比，英超內部分得相當平均。上季（指17/18，篇文出時仲未踢18/19煞科戰）榜首嘅曼城，分1.5億，榜尾嘅西布朗，都有0.95億（9500萬）。相當大鑊飯。當然打歐洲賽嘅另外有更多收入。
你話，啲強隊唔會嘈？點解你咁垃圾都分一億，我咁勁先億五？呢啲就靠賽會同球會大家妥協嘅藝術了。商業化去到極致，就係唔好咁商業化。唔係鳩up，你睇NBA都係咁上下，要有薪酬上限要有選秀權之類，戥返勻個生態。
篇文冇講，但我講嘅，會有人諗，可唔可以應用落社會其他東西度？證明大鑊飯都可以造大個餅，唔會令人唔上進？答案：大佬，即使係包尾嘅西布朗，其實都係近2億（即係，其實廣播費外冇乜收入）鎊收入嘅球會，在全世界計收入都排頭五十（甚至三十）。你當英超二十間球會係頭二十大富豪大家圍標好過，佢地之間均富，同你諗共產主義嗰種，就真係好大距離。
錢買不到勝利：神戶勝利船點收科｜李聲揚
舊年（2018年）3月，我去咗神戶，順便入咗場睇我一生人第一場J League（日職）。其實冇乜咁大不了， 日職好易買飛，行入便利店已經搞掂，唔貴（唔記得幾錢，證明唔貴），亦大把飛買。 睇嘅係神戶勝利船主場對大阪櫻花嘅「阪神打比」。當然入場嘅原因唔係我特別鍾意日本隊或日職（雖則我好似第一季已經在有線睇），而係因為前德國國腳普度斯基加盟。當日佢正選上陣，仲有入波添，值回晒票價。 …
會唔會神戶勝利船可以自給自足？我就好有保留。樓上條數不過係31億人工，到而家去到49億點算？當時已經係靠天價左手交右手嘅贊助吊住。咁你話樂天大把錢，咪再贊助多啲。理論上得，但睇返樓上講嘅三樣嘢咯。總會有一日有人出聲，或者有股東覺得搵笨，或者……
球迷最鍾意講金錢買唔到勝利（例如，神戶勝利船），但殘酷嘅現實係，你咪玩啦。間唔中畀你有一隊阿積士，但講到尾都係富貴球會玩晒。英超嘅迫悉匙六大球會（曼曼車利熱阿），亦同時係世界十大富豪（計收入）球會，而今屆歐聯歐霸四強，亦係英超四隊包辦，當然唔係偶然。十大富豪球會六間英超，咁另外四間呢？唔難估，估錯其實唔夠常識。答案當然係：巴塞，皇馬，巴黎聖日門，拜仁慕尼黑。西甲兩隊，德甲一球，法甲一隊。意甲？冇噃。祖雲達斯剛好在十一。（又題外話講句：所以乜乜英超盛世根本冇乜咁意外，＄嘛。反而西甲可以咁強先神奇，固然巴塞皇馬馬體會（排十三）都富貴，但其他幾甩皮甩骨，不過踢出嚟都交到貨的）
言歸正傳，鍾意講「錢買不到勝利」嘅，又唔使咁灰。睇你點演繹。冇錢呢，就真係冇勝利（所以李斯特城捧盃先真係球壇奇聞，仲要係聯賽唔係盃賽）。但有錢，其實唔包你一定勝利。曼城都唔係呢兩季先富貴啦，利物浦亦都冇點窮過。但對手一樣咁上下富貴。而你見到今季曼城利物浦係雙雙放甩對手幾十個馬位，兩個聯賽咁。呢啲就唔只係金錢可以解釋。
留意個圖未計最後一場，最後曼城98分，利物浦97分
上圖嘅東西好多人講過，但畫埋圖出嚟更好。史上最高分同得失球差最強嘅英格蘭頂級聯賽（81年3分制後）冠軍，當然係上季嘅曼城，100分嘛。第二可能係今季嘅曼城（98分)。但今季嘅利物浦（97分），應該係史上（再講一次，81年後）第三強—偏偏只得第二。因為今季嘅曼城係史上第二強。只能老套講句既生瑜何生亮。兩隊波，都拋離第三位廿幾分。
事實係利物浦嘅表現，在之前（唔計上季）每一個賽季都夠捧盃，而亦都好過晒費格遜皇朝之下任何一屆曼聯，係任何一屆，亦都高分過摩連奴第一季帶車路士（04/05 95分）。利迷可以慢慢J （應該利申下：費格遜年代我是曼迷，而家應該叫做中立球迷）
利物浦點解表現大躍進？有話係高普帶動士氣（上季咪又係佢教），有話係把握力好咗。但其實最大功臣，應該係防守。
樓上個圖列出得失球。亦都同結論吻合：利物浦大進步，但曼城仲大約保持到上季超勁嘅表現。所以利物浦收窄到差距，但仲係爭嗰少少。睇返曼城，入波略為少過上屆，但防守居然仲可以有進步到，相當難得。唔好忘記仲要面對大躍進嘅利物浦喎。
但始終值得講嘅係利物浦。波係入多咗，少少。關鍵就真係防守改善好多。每場平均失少0.4球—其實相當驚人。望下個圖，根本冇一隊可以有咁明顯嘅改善（自抽：調轉就有，曼聯失波，差不多係上一季嘅一個double）。文章認為（都幾明顯）同艾列臣以及雲迪克加盟後表現對辦有關，史上最貴收購物有所值。
實際上即係點？就睇上面嘅圖。好多人鄙L視嘅，expected goal，xG．利物浦今季面對嘅射門，畀上季仲要多。上季畀人射7.4次，今季畀人射8.1次。但只睇呢個數字就誤導，所以要有xG．利浦面對嘅射門，質素低咗好多。可以話對手廢，但更大機會係防守球員令到對手冇乜機會在危險位置起到腳。之前一季，對方起腳入嘅機會講緊13%（唔係計最後結果，係計射門位置之類），今季呢，只係9%。所以面對射門多咗，但失球反而少咗好多，因為啲射門位置唔靚。術語講就係上季對方xG係34.8，今季28.3—儘管今季其實面對射門仲多咗。所以認為xG誤導或廢嘅人，well。
但，更加能人所不能嘅係，龍門幫咗好大忙。上季嘅對方xG係34.8，但對方最後入咗37球——其實唔係特別差，正常嘅variance——但今季堅，對方xG28.3，真實失波只係22球—就相當堅。解釋？可能係對手中咒忘帶射門鞋（但，38場喎，唔同對手喎），可能係球證偏幫（但，38場喎）。更有可能係，個龍勁咯。無論係上身（但，38場喎），定係真係勁。
反而，曼城，就真係冇乜好講。有啲吹脹，但真係我在社交圈，人人都係講利物浦，無論係飛機定惋惜定抽水。但就真係冇人講曼城的！因為太勁，上季已經超勁，今季居然都99%維持到，又真係已經冇乜好講。可以講乜呢？
文章最後引述嘅意見，同我結論差不多（廢話，我都係睇呢篇文）。利物浦嘅聯賽大躍進，就嚟自防守。防守嘅大躍進，就嚟自，買啱人。或者都係「錢買不到勝利」信徒嘅喜訊，證明都仲係有機會慧眼執到平貨。當然講緊嘅平貨，都係破紀錄嘅守門員同中堅轉會費—但to be fair，對手係咪買唔起？肯定唔係。不過似乎對手（唔止講英超）鍾意買中前場球員，可能係9威可能係盲點可能係易滿足球迷或者球員（例如，美斯C朗之類嘅球霸）。利物浦就深烤反其道而行，投資落防守球員度。
固然你可以講：挑，講咁L多咪又係亞軍。但不以勝敗論英雄，至少呢個投資，似乎係相當聰明嘅。再長遠啲諗，其實係咪反映，守門員同中堅嘅身價，真係過度被低估？即係假想實驗諗下，用買雲迪克同艾列臣嘅錢，買個進攻球員，有冇可能提升球隊咁多？
