Paul Joyce談紅軍備戰歐聯決賽的需知事項 | Liverpudlian Ty
利物浦對熱刺嘅歐聯決賽，將於 6 月 1 日，喺馬德里體育會主場 Wanda Metropolitano 球場舉行。Times Sport 嘅記者 Paul Joyce，詳盡地報道關於歐聯決賽各方面嘅需知。當中關於兩隊晉身決賽球隊嘅相關資訊，喺度同大家分享吓。
英超聯賽喺星期日就會煞科，三個星期之後，先至踢歐聯決賽，咁利物浦同熱刺會做啲咩呢？
利物浦嘅計劃仍然有待最終確定，但係領隊高普會用佢喺德國嘅經驗，將呢段時間視為「一個小型嘅歇冬期」。球隊踢完英超煞科日對狼隊場波嘅 48 小時之後，如常進行操練，然後班球員就會休息 5 日。佢哋可以前往外地，但唔係去長程嘅旅遊，然後喺 5 月 20 日嗰個星期初，返回球會報到。
到其時距離歐聯決賽仲有兩個星期，喺 5 月 20 日至 5 月 30 日呢段期間，會喺西班牙進行一個為期一星期嘅溫暖氣候集訓營，地點會係 Marbella 或者馬略卡。及後利物浦大軍會先返回利市，並且可能會喺 5 月 30 日返回馬德里，屆時距離決賽仲有兩日，並且安頓落嚟。
至於熱刺，佢哋將會如常操練，並且會休息幾日，但係佢哋唔預期會去外地進行集訓營。
邊啲球員可能會係最後一次為佢哋嘅球會上陣呢？
占士米拿同利物浦仲有一年合約，仍然係球隊嘅重要一員。續約談判可能會喺夏天進行，因為利物浦想呢位現年 33 歲嘅球員留隊，佢喺星期二對巴塞隆拿場波，代替受傷嘅羅拔臣踢左閘，表現出色。
對手熱刺嚟講，艾達韋列特只餘下一年合約，並且可以離隊，標價 €30M (大約 £25.8M)。艾歷臣剩番一年合約，有西班牙及意大利球會對佢有興趣。路蘭迪今季合約期滿，但球會有續約一年嘅選項。另外，球會喺夏天有意考慮關於雲遜贊臣、尼高度、捷比亞、奧利亞、雲耶馬及拉美拿嘅報價。
呢兩隊波屆時會否喺冇傷停嘅情況下排兵佈陣呢？
以現時嘅情況嚟睇，利物浦只有拿比基達因為內收肌受傷，所以未能上陣。沙拿、羅拔臣、張伯倫、費明奴及拉蘭拿都可以候命。
熱刺則希望最終只有雲克斯一名傷兵，佢正在從腹股溝手術中復原。足踝受傷嘅前鋒哈利簡尼有信心能夠趕及上陣，華湯根嘅腳部受傷並冇早前所擔心嘅咁嚴重。
哈利簡尼因為左腳足踝韌帶受傷，已經抖咗一個月，但係過往佢有類似傷患嘅時候，都康復得快。華湯根對阿積士之後，要喺右腳著上保護靴，並且使用拐杖。佢嘅足踝有少少傷，但係預料佢可以上陣踢決賽。至於腿筋受傷嘅奧利亞，屆時都應該冇咩問題。
有啲球員會喺六月要踢歐洲國家聯賽、美洲國家盃同非洲國家盃，咁呢兩間球會會點樣處理呢？
對於高普嚟講，可謂束手無策。球員將要向所屬嘅國家足總報到，參與上述國際賽事。但係高普將會俾佢哋完全放假至少兩個星期，呢個情況可能會對利物浦季前嘅準備受到好大嘅影響。利物浦將於 7 月，進行一個星期嘅美國之旅，會踢三場賽事。
熱刺亦都應該會俾參與國際賽嘅球員一個長啲嘅休息，佢哋將會參加國冠盃 (ICC)。
歐洲國家聯賽， 6 月 5 日至 6 月 9 日
利物浦： 軒達臣、祖高美斯、阿歷山大阿諾 (英格蘭)； 雲迪克、韋拿杜姆 (荷蘭)；沙基利 (瑞士)
熱刺： 哈利簡尼、捷比亞、丹尼路斯、艾歷迪亞、迪利阿里 (英格蘭)
美洲國家盃，6 月 14 日至 7 月 7 日
利物浦： 費明奴、艾利臣、法賓奴 (巴西)
熱刺： 盧卡斯摩拉 (巴西)、拉美拿、科夫 (阿根廷)、 戴雲遜山齊士 (哥倫比亞)
非洲國家盃, 6 月 21 日至 7 月 19 日
利物浦： 文尼 (塞內加爾)、沙拿 (埃及)
熱刺： 雲耶馬 (肯雅)、奧利亞 (科特迪瓦)
邊個會係歐聯決賽嘅球證呢？
下個星期會公佈邊個會係歐聯決賽嘅球證，但係好大可能唔會係英國人。有傳聞話會係一位西班牙球證，名為 Antonio Mateu Lahoz，佢今季曾經為 6 場歐聯賽事執法。另一個人選可能係今季為 4 場歐聯賽事執法嘅 Carlos Del Cerro Grande。
高普同普捷天奴嘅對賽紀錄係點架？
呢兩位領隊喺執教利物浦及熱刺期間，對過 9 次。其中高普贏咗 4 次，和 4 次，輸咗 1 次。唯一一次俾普捷天奴擊敗嘅賽事，係喺 2017 年 10 月，熱刺喺溫布萊球場贏利物浦 4-1。
經過上年歐聯決賽失意嘅經驗，利物浦會否做一啲同上次唔同嘅事情呢？
利物浦嘅備戰暢順地進行，高普相信，當時沙拿喺上半場傷出，改變咗場波，所以邏輯上冇咩需要作出改變，佢哋只係希望到時運氣會好啲。
有冇計劃搞勝利巡遊呢？
如果能夠贏取錦標的話，利物浦將於 6 月 2 日，下午 4 點舉行勝利巡遊，並且已定下巡遊路線。
至於熱刺，佢哋暫時未有討論關於勝利巡遊嘅計劃，但係揀邊一日，可能會受球員要去踢國際賽事、要俾當地政府批准，同埋市民嘅上班情況等等。
所有內容，可參閱原文網址。
