高普：做得英格蘭大球會當然想留歐 | Liverpudlian Ty
利物浦喺主場進行嘅歐聯四強次回合，喺首回合落後三球，兼且喺沙拿及費明奴兩大鋒將缺陣下，絕地反擊，以 4-0 大勝巴塞隆拿，締造經典戰役，兩回合計以 4-3 擊敗對手，連續兩年晉身歐聯決賽，將與熱刺爭奪歐聯冠軍。
嚟緊重返聯賽嘅紅軍，將於煞科日，喺主場迎戰「強隊殺手」狼隊，屆時必須全取三分，同時要曼城作客白禮頓失分，利物浦先至能夠奪得本季英超聯賽冠軍。利物浦喺需要做好自己嘅同時，會否奇蹟再現呢？領隊高普出席賽前記者招待會，以下係主要內容。
1. 高普表示：「呢個係充滿奇蹟嘅一個星期。如果喺週末，我哋有另一個重大時刻嘅話，會係一件美好嘅事。」
2. 高普認為：「要成為冠軍仍然係困難嘅，我哋唯一可以做嘅嘢，就係去贏波。狼隊喺呢一年已經展現咗，佢哋享受佢哋嘅足球。」
3. 高普話：「白禮頓充滿咗歡樂嘅球員，同埋我知道佢哋會嘗試去做所有嘅嘢。」
4. 高普表示：「我哋能夠晉身歐聯決賽，係因為我哋嘅渴望，同樣熱刺都係。」
5. 高普話：「英格蘭嘅大球會都想留喺歐洲，並且留住佢哋所擁有嘅嘢，而其他嘅並唔想留歐！」
6. 高普話：「呢個星期喺更衣室最流行嘅三個大字係 – It’s only pain (只係痛楚啫)。軒達臣同羅拔臣都有咁樣講過，但係其實真係痛架。不過佢哋應該冇乜事嘅。」
7. 費明奴無法上陣對狼隊，但係預期能夠喺歐聯決賽上陣。沙拿今日已經恢復操練。
8. 高普表示：「星期二係足球史上其中一個最美好嘅時刻，唔止係利物浦。但係宜家係講緊星期日場波，狼隊將會想表現出，佢哋唔係嚟到此一遊，我哋需要準備好。」
9. 高普話：「喺星期二夜晚之後，你會需要一個鎚仔揼走臉上嘅笑容！」
10. 談及歐洲國家聯賽，高普認為：「喺 6 月 1 日，我哋有歐聯決賽，然後喺 6 月 6 日，就會進行呢項精彩嘅賽事。如果我哋唔懂得去保護球員嘅話，咁唯一會出現嘅機會就係破壞同埋摧毀咗一場精彩嘅球賽。」
11. 講到與利物浦球迷之間嘅關係，高普表示：「呢個完全係關乎班球員嘅表現。我可能會成為世上最有趣嘅人，但係如果班球員冇表現嘅話，咁冇人會對我嘅笑話發笑！」
12. 被問到星期日會唔會係史杜歷治同摩蘭奴喺晏菲路與球迷告別，高普話：「我唔知道，佢哋今季合約期滿，宜家唔係講呢啲嘢嘅時候。」
13. 講到啲球迷要為歐聯決賽撲飛，同埋前往當地嘅高昂成本，高普認為：「呢個係困難嘅，貴到令人難以置信。去巴庫睇歐霸盃決賽係真係有趣嘅，不過有啲決定係必須更加合情理。我聽聞過喺馬德里搵間房，平時 £100 就得架喇，宜家要 £2700，呢個係瘋狂嘅。」
14. 談及佢麾下利物浦球員嗰種好強嘅心理質素同埋心態，高普話：「呢個係佢哋已經為一場賽事所遇到嘅困難作好準備。堅持同貫徹場波嘅計劃真係重要嘅，保持一致，達致穩定係最困難嘅事。呢班球員係一個特別嘅群體 – 呢個就係點解佢哋會攞到 94 分。」
