巴塞四強出局，利記照袋430萬鎊？｜Liverpudlian Ty
利物浦喺 2018 年 1 月，將古天奴售予巴塞隆拿，轉會費高達 £142M。前晚利物浦喺歐聯四強次回合，主場大勝巴塞隆拿 4-0，啟動咗有關古天奴轉會費嘅其中一個價值 £4.3M 嘅浮動條款。
古天奴今次重返晏菲路嘅經歷並唔係咁好，佢效力嘅巴塞隆拿，作客被利物浦連入四球，反敗為勝，被淘汰出局。
有啲媒體報道，巴塞隆拿無法晉身歐聯決賽，令利物浦收唔到一筆價值 £5M 嘅轉會費浮動條款。
但係據了解，其實古天奴轉會費嘅其中一個浮動條款係，如果巴塞隆拿今季能夠打入歐聯八強嘅話，利物浦就可以收到 €5M (即係 £4.3M)。
因為巴塞隆拿已經入咗歐聯八強，所以利物浦仍然能夠得到呢筆收入。
古天奴自從加盟巴塞隆拿以來，表現一直未如預期，令到佢喺隊中嘅前途越來越唔明朗。
現年 26 歲嘅古天奴，為巴塞隆拿上陣 74 次，射入 21 球。歐聯四強對利物浦嘅兩個回合，佢都被換出。
如果巴塞隆拿決定出售古天奴，佢哋將會面臨「蝕大本」嘅機會。
呢單轉會係由利物浦體育總監米高愛華士處理，現時越來越可能成為利物浦球會史上，其中一項最好嘅交易。
喺呢單轉會，利物浦會收到 £106M，仲有 £36M 嘅浮動條款。而利物浦從國際米蘭羅致古天奴，轉會費只有 £8.5M。
利物浦及後將呢筆轉會費精明地使用，羅致雲迪克及艾利臣，幫助紅軍連續兩年晉身歐聯決賽同埋競逐英超聯賽錦標。
