沙拿趕及復出戰狼隊｜Liverpudlian Ty
根據前利物浦官網記者，現時於 London Evening Standard 任職嘅 David Lynch，沙拿可以上陣對狼隊嘅英超煞科戰。
呢位埃及攻擊球員喺對紐卡素嘅聯賽中，與對方門將杜巴夫卡相撞，呢個意外導致佢出現腦震盪嘅情況。及後喺歐聯四強次回合，主場反勝巴塞隆拿嘅經典賽事，佢無法上陣。
但係，據了解，沙拿將於星期日對狼隊嘅英超煞科戰中復出，協助利物浦爭奪聯賽冠軍。
喺最後一週嘅英超聯賽，如果利物浦喺主場擊敗狼隊，曼城作客白禮頓失分嘅話，利物浦就會成為英超聯賽冠軍。
現時喺聯賽射手榜領先嘅沙拿能夠復出，除咗能夠幫助利物浦之外，對再次奪取英超金靴獎嘅機會亦有幫助，佢現時有兩球嘅優勢。
利物浦現時仍要等待羅拔臣受傷嘅進一步消息。呢位蘇格蘭左閘喺歐聯四強對巴塞隆拿嘅時候，與對方前鋒蘇亞雷斯嘅對壘下，小腿受傷。
對於羅拔臣能否喺歐聯決賽上陣，利物浦嘅醫療團隊對此並唔擔心，至於能否趕及上陣對狼隊，就要睇吓稍後時間嘅消息同埋報告。
