「戰略上藐視敵人，戰術上重視敵人」：面對利記復興曼聯球迷如何自處？｜Brandon Yau
對唔住，作為 15 年曼迷，我無辦法唔為尋晚嘅利物浦，甚至係呢兩三年嘅利物浦鼓掌。Respect。
我開始睇波嗰陣，曼聯雖然稍為下滑，但仍然有 92 一代撐住，當年利物浦仲係用緊候利亞，入埋一堆九唔搭八、擺明用來收回佣嘅廢柴。
後來 05 年伊斯坦布爾奇蹟，利物浦在賓尼迪斯治下開始復甦，謝拉特、阿朗素、馬斯查蘭奴係英超最強中場，托利斯場場都搞到維迪食紅牌。但時也命也，費格遜笑到最後，曼聯事隔九年再奪歐聯，英超心理戰激到賓賓嘔血，賓帥黯然離去。
此後利物浦經歷學神、杜格利殊、羅渣士，建隊哲學不彰、大量收購英人及一堆水貨；FSG 被球迷鞭撻程度，比格拉沙之於曼迷不遑多讓，同樣被批評為商業至上、唔識足球。
好景不常，費 sir 退休之後，輪到曼聯交足學費，由莫耶斯、雲高爾到摩連奴，名帥來完又走，球員轉會費同薪酬水漲船高，但商業上成功始終不能掩蓋球場表現不濟、建隊策略全無。球隊上下都越來越迷失，球星扭計彈琴剪頭髮多過踢波。
另一邊廂，利物浦領導層終於大徹大悟，建立 transfer committee 促進理性投資，請來高普並信任高普重建球隊，買入實而不華嘅球員融入體系，苦苦耕耘幾季終於見到成績，場上表現及精神面貌亦得到球迷認同。
今季理應係利物浦收成嘅一季，因為世界應該係公平嘅。真正好波應該要得到回報。利物浦主力年齡結構睇落更加有力開啟皇朝——既生瑜，何生亮，如果唔係曼城都咁撚勁……
我點會估得到，有一日見到利物浦贏波我會咁開心，追和嗰陣大叫咗出嚟！經歷咁多年重建再重建終於見到成果，they totally deserve it。
後費格遜年代嘅曼聯，正正在走利物浦當年老路。我唔係話要長他人志氣滅自己威風，而係知古鑑今，唔知曼聯幾時先至走完呢個輪迴？
資訊浩瀚；東張西望。
竭盡所能；深入求真。
企高一格；全新體法。
