他時若遂凌雲志：奧歷治｜Liverpudlian Ty
利物浦喺歐聯四強次回合大勝巴塞隆拿，奧歷治嘅風頭可謂蓋過咗美斯，成為焦點。
本身喜愛彈琴嘅奧歷治，琴晚梅開二度，其中一個入球，更加係致勝入球，協助利物浦淘汰巴塞隆拿，晉身歐聯決賽。
巴塞隆拿隊長美斯，係世上最偉大嘅球員，佢喺晏菲路球場上，臉上留下一個完全唔能夠相信嘅表情。冇問題發問、冇說話、冇眼神接觸。
邊個可以怪佢呢？
原文：Lionel who? The night Origi overshadowed Messi and became a Liverpool cult hero
作者：Neil Jones
本應預期係屬於美斯嘅一年，亦都係佢帶領球隊返回歐洲之巔嘅一年。四年無緣歐聯決賽，對於好似巴塞隆拿呢類球會，同埋好似美斯呢類球員，就好似一世人嘅時間咁長。呢一年應該係，佢應承過會係。
但係呢一次，美斯呈現出佢嘅無力感。佢冇估計到晏菲路球場嘅非凡同埋令人無法解釋嘅力量。佢冇估計到利物浦會有一班人挺身而出，為球會、領隊同埋球迷努力，成為球隊嘅英雄。
佢都冇估計到，由奧歷治射入致勝入球。
奧歷治嘅入球，中間夾住韋拿杜姆嘅兩個入球，喺令人最難以置信嘅情況下，協助利物浦晉身歐聯決賽。利物浦將於下個月喺馬德里踢歐聯決賽，對手係阿積士或者熱刺嘅勝方。利物浦宜家係奪標大熱門，喺一個星期前，又有邊個會想像到嘅呢？
邊個會想像到係奧歷治協助利物浦打入歐聯決賽呢？喺一年前，奧歷治身處禾夫斯堡，協助呢間德甲球會護級。喺外借去德國期間，佢射入咗 9 球，佢嘅表現，好多時都係平平無奇。
喺上個夏天，奧歷治本應可以加盟狼隊，如果佢肯嘅話。及後佢同利物浦 U23 開始呢個球季。老實講，佢嘅表現都唔係特別出色。
睇吓佢宜家，成為咗密西塞特郡打吡嘅英雄。對紐卡素場波，佢係救世主嚟，宜家仲成為咗歐聯四強之星。
奧歷治嘅故事並唔平凡，係關於毅力、環境、好嘅運氣同埋自信。就好似好多呢隊利物浦嘅球員咁樣，奧歷治受過打擊同埋質疑。佢曾經被抹煞同埋苦苦爭扎。到宜家，佢仍然戰鬥、仍然取得入球，佢果然有其性格。
今次只係佢今季第六次正選上陣，因為沙拿、費明奴及拿比基達受傷，奧歷治成為緊急解決方案。同沙基利一樣，唔會預期奧歷治會喺呢場咁重要嘅賽事正選上陣，但係當你有機會嘅時候，你所能夠做嘅，就係把握機會，而佢做到喇。
奧歷治宜家已經有六個入球。只有沙拿、文尼、費明奴同埋占士米拿嘅入球比佢多。佢喺十二月，打破咗愛華頓球迷嘅心。喺星期六，作客紐卡素，佢協助利物浦繼續有爭取成為聯賽冠軍嘅希望。宜家，佢消滅咗巴塞隆拿。佢並唔係主將，一躍而成為焦點。
佢喺 Melwood 好受歡迎。佢熱愛彈鋼琴，並且亦會利用空餘時間睇紀錄片同埋學習唔同嘅語言。佢崇拜亨利同埋賓斯馬等等，同埋會花時間去睇一啲前鋒嘅影片，睇佢哋嘅跑動同埋入球。利物浦教練團成員私底下鼓勵奧歷治，多啲做自己，而唔係只係留意人哋點樣踢。
宜家奧歷治能夠成為佢自己喇。佢宜家有機會好似佢所仰慕嘅球員咁樣，去奪取歐洲足球嘅最高榮譽。
當然佢可能喺歐聯決賽唔會正選上陣，到時沙拿及費明奴應該都可以復出喇。
但係，如果利物浦喺馬德里需要奧歷治嘅話，佢就會準備就緒。
畢竟如果你能夠喺呢個大舞台上，鋒芒能夠蓋過咗美斯嘅話，你能夠做到任何嘅事。
