高普：上季基輔之敗推動我哋回歸歐聯決賽 | Liverpudlian Ty
利物浦喺歐聯四強次回合，喺主場以 4-0 大勝巴塞隆拿，絕地反擊成功，締造另一經典戰役，連續兩年晉身歐聯決賽。
完場後球員嘅激情場面，領隊高普形容，「呢間球會就好似瘋狂咁觸動你。」
喺首回合作客巴塞隆拿，以 0-3 落敗，似乎利物浦要晉身歐聯決賽，仲有好長嘅路要走。
但係利物浦喺晏菲路，成功作出歷來其中一次嘅最經典嘅絕地反擊，以 4-0 大勝，昂然晉身決賽。
喺賽後，高普形容佢嘅球員熱淚盈眶，並且全體喺 Kop 與球迷慶祝。呢個情景，佢覺得係利物浦獨有嘅。
高普話：「我哋知道，呢間球會係氣氛、激情、渴望同埋球賽質素嘅混合體，缺一不可，呢樣嘢我哋知道嘅。」
「我之前曾經講過，如果我要去形容呢間球會，係充滿愛與美善。同埋今晚，好明顯係瘋狂嘅，就好似瘋狂地衝擊你嘅心。你可以聽到，並且可能喺世界各地都感受得到。」
「我真係好開心，可以俾大家有一個咁嘅體驗。同埋喺我哋嘅角度嚟講，能夠有另一個機會可以重返正軌，我真係感到高興。」
「當我喺比賽結束之後，睇到班球員，同埋睇到佢哋眼中嘅淚水，呢個就係足球，佢哋係專業嘅球員，宜家都仍然係咁樣。」
「呢間球會就好似瘋狂一樣觸動你，就好似你喺呢啲時刻，所感受到嘅，會比其他嘅更多。 呢個真係好美妙嘅事，我好喜歡。」
球隊表現上嚟講，利物浦喺首回合作客巴塞隆拿大敗，實在頗為不幸，當中有啲嘢係高普作為球隊喺次回合嘅準備工作。
但係高普自己都承認，冇諗過有可能會反敗為勝，呢種信念係來自球員。
高普補充：「班球員所做嘅嘢，再一次要講嘅係，包括剛才所講嘅，氣氛、激情、渴望同埋球賽質素嘅混合體，充滿愛與美善，同埋球技，係令人難以置信嘅。」
「如果你有機會嘅話，你要取得入球，否則你就會被懲罰。今晚我哋入到波，並且使用唔同嘅方法。」
「我宜家已經經常講到，有啲咩原因令到呢件事變成可能。同埋喺賽前，我同班球員講，「我唔覺得呢件事係有可能，但係因為係你哋，所以我覺得我哋會有機會。」因為佢哋真係精神上嘅巨人。」
高普亦都透露，上年歐聯決賽嘅落敗，點樣推動呢班球員再次晉身決賽。
自從執教利物浦以來，高普帶隊喺決賽嘅成績未如理想，宜家佢係時候將呢啲紀錄修正同埋改變。
高普話：「我哋冇將呢場波同伊斯坦堡奇蹟或者其他事情作比較。一開始我哋已經講過，我哋要創造自己嘅歷史。唔係因為我哋唔喜歡球會嘅歷史，唔係，而係因為，明顯地，我哋需要新嘅篇章。呢班球員已經做到喇，係難以置信嘅。」
「我知道啲人講我同埋決賽中落敗，呢啲事情係絕對正確，全部都冇問題。呢個係我哋第四個決賽，已經係一件相當特別嘅事。」
「上年我哋真係覺得，我哋要重返決賽。我哋要重返決賽，唔能夠再繼續咁樣落去，呢個係唔可能嘅。宜家我哋有另一個機會，同埋當然會爭取奪得呢項錦標。」
