蘇亞雷斯：期望回歸晏菲路時畀我嘅歡呼聲比哨子聲多 | Liverpudlian Ty
曾效力利物浦嘅巴塞隆拿前鋒蘇亞雷斯，喺主場對利物浦時，佢嘅熱烈慶祝及挑釁利物浦球員等行為，備受外界爭議。佢今日重返利物浦，以巴塞隆拿球員身份出席賽前記者招待會，以下係主要內容。
1. 蘇亞雷斯表示：「我哋知道，我哋要面對一個真係難應付嘅對手，但係我哋亦都意識到，我哋有我哋自己嘅攻擊火力，以便能夠晉身決賽。我哋知道，喺一個充滿歷史嘅球場上作賽，會有幾困難。」
2. 蘇亞雷斯話：「喺利物浦渡過幾個美好嘅年頭，返嚟嘅感覺係特別嘅。對於球迷接受同支持，我經常都好感激。喺效力利物浦期間，我有美好嘅回憶。」
3. 蘇亞雷斯表示：「利物浦球迷係佢哋嘅第十二人，佢哋相當傾力支持球隊，我哋要小心同埋要注意呢樣嘢。」
4. 講到利物浦，蘇亞雷斯認為：「利物浦會俾壓力我哋，我哋一定唔可以作出愚蠢嘅犯規，因為佢哋有高大嘅球員，我哋唔可以容許佢哋以佢哋嘅步伐行事。」
5. 蘇亞雷斯認為：「占士米拿話，我哋會唔習慣面對好似利物浦咁樣踢法嘅球隊，但係我唔認為利物浦會習慣面對好似我哋用波用得咁好嘅球隊。」
6. 再次講到利物浦，蘇亞雷斯表示：「我對所有嘅利物浦球迷都非常尊重，我非常感謝佢哋。如果我喺呢度對利物浦入咗波，我唔會以同樣嘅方式慶祝。」
7. 蘇亞雷斯話：「沙拿係一個好重要嘅球員，佢喺過去幾年，係世界頭三位最頂尖嘅球員。對利物浦嚟講，冇咗沙拿係一個大損失，但係佢哋有一啲有質素同實力嘅球員，好似史杜歷治、奧歷治及沙基利。」
8. 講到上季歐聯被羅馬淘汰出局，蘇亞雷斯表示：「你要從錯誤中學習，我哋當時太過放鬆喇。如果你有 30 秒唔專心，佢哋能夠取得入球，令到球迷興奮起嚟。你需要有個意識去確保呢啲情況唔好再發生。」
9. 蘇亞雷斯話：「利物浦令我變得更加專業同埋成熟，同經驗豐富嘅球員一齊，令我變得更好。成為利物浦隊長，係我職業生涯最驕傲嘅時刻之一。當我仲喺球隊之中嘅時候，我哋嘅關係非常緊密嘅。」
10. 蘇亞雷斯認為：「首回合嘅戰果，並唔反映到球賽嘅所有情況，因為佢哋創造咗好多機會。我哋係面對一隊上年打入決賽嘅球隊。」
11. 談及晏菲路球迷會點樣迎接佢，蘇亞雷斯表示：「我以往喺度所做嘅一切，同埋我對利物浦嘅感謝 …… 球隊曾經有四或者五年未能晉身歐聯賽事，喺呢度嘅人知道我以往喺度所做嘅嘢。我覺得到時將會俾我嘅歡呼聲比哨子聲多。」
以上係蘇亞雷斯喺賽前記招嘅說話。有部份媒體認為，係想為佢喺首回合嘅行為降吓溫。究竟係唔係呢？請大家自行判斷。
